Akisussaassuseqarnissaq borgmesterip ujartorpaa
Nunaqqatigiinni inersimasortaasut, meeqqanut taakkualu atugarissarnissaannut akisussaassuseqarnerat Kommune Kujallermi borgmesterip maanna ujartorpaa.
Qaqortumi nukappiaraq 13-iinnarnik ukiulik benziinamik naamaareerluni ippassaq unnuakkut toqusimammat taamaaliorpoq.
Allattoq Jens Thorin
juulip 20-at 2012 07:08
Taamatut alianartumik toqusoqarnera Qaqortormiorpassuit attorneqaatigaat.
- Soorunami tupannarpoq alianarlunilu. Kisianni tassa ullutsinni taamatut pisoqarsinnaasarpoq. Ilungersorluni taamatut pisoqarnissaa pitsaaliorniaraluarlugu ilaatigut taamatut pisoqarsinnaasarpoq, borgmester Simon Simonsen oqarpoq.
Alianartumik toqusoqarnerata kingorna politiit angallataatillit suliffeqarfiillu kaammattorpaat benzinat gassillu isumannaatsumut parnaartakkamut inissittaqullugit.
Taamalu kajumissaarineq borgmesterimit ilalerneqarpoq.
