Akisussaassuseqarluni angajoqqaanngortarnissaq suleqatigiissutigilerpaat

Qitornartaarnissamut piareersimaneq, inuusamik paaqqutaqartarneq naartusunullu piaartumik iliuuseqartarneq. Suliniutit pingasut taakkua PAARISA-p, peqqissutsimut aamma isumaginninnermut naalakkersuisoqarfiup suleqatigiiffigisassatut maanna isumaqatigiissutigaat.
februaarip 22-at 2010 15:15

Suleqatigiinnissamut isumaqatigiissut pillugu Peqqissutsimut Naalakkersuisoq ima oqarpoq:

- Misilittakkat paasinarsisippaat oqartussaasut assigiinngitsut akornanni pinaveersaartitsiniarluni suleqatigiikkaangatta angusaqarluartartugut. Naartusarneq angajoqqaajunerlu pillugit suliniutit pingasut pingaarutillit pillugit suleqatigiinnissamik isumaqatigiissuteqarnerput taamaattumik naammagisimaartorujussuuara, Peqqissutsimut Naalakkersuisoq Agathe Fontain oqarpoq.

Suliniutini pingasuni ilaatigut siunertaapput ilaqutariinnut naartusortalinnut tapersersuineq, angajoqqaanngortussat perorsaanermut inooqataanikkullu attaveqaatinut tunngatillugu piginnaasaasa nukittorsarnissaat kiisalu inuusamik paaqqutaqartarnermi inuusuttut angajoqqaanngornerup qanoq ittuuneranik piviusorsiortumik paasitinneqarnissaat.

Peqqissutsimut pisortaqarfik najukkani ernisussiortunik peqqinnissaqarfimmilu sulisunik ikiorteqartitsissaaq isumaginninnermullu pisortaqarfik sulisut akissarsiaannut inuusanillu pisinissamut 1 mio. koruuninik pissaqartitsilluni, PAARISA-lu ininik attartugassanik pissaqartitsissaaq 1,2 mio. koruuninillu aningaasaliilluni.

Aammattaaq PAARISA suliniutinik aqutsisuussaaq kingornatigullu naliliinissaq qulakkiissallugu.