Akisussaanermik misigisimanissaq ujartorpaa
Inooqataanermut akisussaanermik misigisimaneq pikkoriffiginerussavarput.
Taama isumaqarpoq isumaginninnermut naalakkersuisoq Maliina Abelsen.
Nunatsinnili ullutsinni inooqataanermut akisussaassuseqarnermik misigisimaneq soqutigineqanngippallaartoq, Naalakkersuisoq isumaqarpoq.
Taamaattumik isummiussanik allanngortitsisoqartariaqarpoq Maliina Abelsenillu Nunani Avannarlerni peqatigiiffiup ataatsimeersuartitsinerani meeqqanik naalliutsitsineq sumiginnaanerlu pillugit isummani Københavnimi ippassaq oqalugiarnermini saqqummiuppai.
- Isummiussat allanngoriartortinneqarnerannik siunertaq tassaavoq innuttaasut ataasiakkaat sapinngisamik annerpaamik nammineersinnaallutik inuusinnaanissaat, taamaassappallu innuttaasut ataasiakkaat akisussaaffimmik tigusinissamut pisariaqartunik ilisimasaqartariaqarput akisussaasutullu misigisimasariaqarlutik, Maliina Abelsen oqalugiarnermini ilaatigut taama oqarpoq.