Akisussaaffinnik tigooraanissaq ataqatigiissaarneqassaaq
- Tassa peqqutaanerpaanut ilaapput, massakkumut suliassanik nussuinissaagaluaq 2009-mili pisussaagaluartoq kinguaattoornikuummat, Naalakkersuisunut ilaasortaq Anthon Frederiksen Naalakkersuinikkut allaffissornikkullu suleqatigiissitanik pilersitsinissamut tunngavik pillugu oqarpoq.
Kommunit Namminersorlutik Oqartussanit akisussaaffinnik tigusiniarnerat maanna ukiup aappaa avillugu kinguaattooqqasoq suleqatigiissitanik pilersitsinikkut pitsanngorsaavigineqarumasoq, Naalakkersuisut Siulittaasuat Kuupik Kleist oqarpoq.
-Naalakkersuisuniit isumaqarpugut attaveqatigiinnerput, tassa Naalakkersuisut KANUKOKA-p akornanni kiisalu Naalakkersuisut kommunillu akornanni pitsanngorsaavigineqartariaqartoq. Aammalu attaveqatigiinnitta oqaloqatigiittarnittalu, soorlu imminut assortuutikujunnerminngaanniit siunertaqarnerusumut ingerlanneqartariaqartoq. Naalakkersuisut siulittaasuat Kuupik Kleist oqarpoq.
Naalakkersuinikkut uku ataqatigiissaarisuussapput: Naalakkersuisut siulittaasuat Kuupik Kleist, Naalakkersuisunut Ilaasortaq Anthon Frederiksen, KANUKOKA-mi siulersusiuni siulittaasoq, Enok Sandgreen kiisalu Qeqqata Kommuniani Borgmester, Hermann Berthelsen.
-Tassa qulakkeerniassuarput pitsaanerpaamik tigusassagut ilusilersorneqarnissaat. Aammalu tamatta naammagisatsinnik suliassat kommuninut tunniussuunneqarnissaat, KANUKOKA-mi siulittaasoq Enok Sandgreen oqarpoq.
Suut suliassat siulliunneqassappat?
- Isumaginninnermut tunngasut ingerlappavut aamma PPR kiisalu immikkut ilinniartitaanermut tunngasut taakkua salliullugit qularnanngilaq suliarineqassapput, Enok Sandgreen oqarpoq.
