Akisussaaffimmik qimarratiginnipput

maajip 06-at 2006 14:14

- Politikerit qaffasissumik inissisimasut kukkuluttuutitik pillugit tusagassiuutitigut atorfilittaminnik pisuutitsiniartarnerat akuersaarsinnaanngilarput. Taama Atorfillit Kattuffianni siulittaasoq Erik Hammeken tusagassiuutitigut allakkamini allappoq.

Atorfillit Kattuffiat aamma allappoq atorfilittat qullersamik peqqussutaat malillugit sulisartut, taamaattumillu politikeriniit tunngavissaqanngitsumik uppernarsarneqanngitsumillu kukkuluttuutinut assigisaannullu atorfilittat pisuutittuassallugit akikippallaartoq, Atorfillit Kattuffiat isumaqarpoq.

Politikerit taama pissusilersortarnerat naalakkersuisuni inatsisartunilu kisimi pineq ajortoq, sinerissamili kommunini politikerinit aamma atorneqartoq, Atorfilit Kattuffiat oqarpoq.

- Politikerit atorfilittuulli sulisitsisuminnut, tassalu qinersisartunut, ataqqinninnissamik, aalajaatsuunissamik pissuserissaarnissamillu paasinninerulernissaat neriuutigivarput, Atorillit Kattuffiat allappoq.