Akisussaaffiit pitsaanerusumik agguarusuppaat

Borgmesterit Naalakkersuisullu atugarissaarneq qulakkeerusullugu suliuniuteqarput
Allattoq Carla Davidsen
marsip 15-at 2012 09:34

- Kinguaariit tullinnguuttut atugarissaaginnarnissaat qulakkeerniarlugu ataatsimoortumik suliniuteqartoqarnissaa pisariaqartinneqarpoq.

Kommunit Ilulissani ataatsimiinneranni pisortat aningaasaqarneranni ajornartorsiorneq annertusiartuinnartoq eqqartoreerlugu borgmesterit Naalakkersuisullu taama oqarput.

Namminersorlutik Oqartussat kommunillu aningaasaqarnerisa aqunneqarnerat borgmesterit Naalakkersuisullu  pitsanngorsarusuppaat, ullut marluk ataatsimeereerlutik ataatsimeeqatigiit oqarput.

- Namminersorlutik Oqartussat kommunillu aningaasaqarnerisa aqunneqarnerat pitsanngortissavarput, pisortat suliaannik tigusisarneq sunniuteqarnerusumik ingerlanneqassaaq, kommunit innuttaasullu eqqarsaatigalugit assigiinnerusumik ingerlatsisoqarluni. Susassaqarfiit Namminersorlutik Oqartussat kommunillu isumagisaat akisussaaffitsigut assigiinnerusumik erseqqinnerusumillu isumagineqartariaqarput, aningaasaqarnermut naalakkersuisoq, Maliina Abelsen, oqarpoq.

Akiitsut kommunit Namminersorlutillu Oqartussat ataatsimoorlutik appartinniarsariniarpaat. taamaammat suleqatigiissitaq massakkut akiliisitsiniartarnermut iliuusissamut ataatsimut missingiummik suliaqassaaq, Kalaallit Nunaanni Kommunit Kattuffiata, KANUKOKA-p, siulittaasua, Martha Abelsen, oqarpoq. Iliuusissap ukioq-manna juunip naannginnerani piareersimanissaa taassuma neriuutigaa.