Akisussaaffeqarnermik misigisimaneq annikitsuinnaavoq
Nunarsuarmi pisoqarfiunerpaat alaamillugit nunarsuarmi issinnerusunut qiviarnissaq ajornaatsuinnaanngilaq. Folketingimi Atlantikup Avannaani sillimaniarnermut politikki pillugu ippassaq ataatsimeersuartoqarmat tamanna takuneqarsinnaavoq. Naak nunarsuup ilaa tamanna illersornissamit isigalugu pingaaruteqaraluartoq, ataatsimut akisussaaffeqarnermik misigisimaneq annikitsuinnaavoq.
Tamakkingajallutik peqataapput. Atlantikup avannaani suleqatigiit. Namminersornerullutik Oqartussat qullersaat. Illersornissamut ministeri. Naalagaaffiit Qalasersuarmut sammisut aallartitaat sisamaasut. Anguterpassuit qilerniusamaartut taartunillu jakkillit akornanni arnamik ataatsimilluunniit takusassaqanngilaq. Tassa ajoraluartumik Canadap aallartitaa Fredericka Gregory peqataarusussimanngimmat.
Aamma Folketingip nunanut allanut ataatsimiititaliaani ilaasortat ilaanngillat. Tassami ilaatigut Folketingimi Danmarkip Irakimi sorsoqataanera Folketingimi oqaluuserineqarmat, ilaatigullu filmi piviusulersaarut Afghanistanimi danskit sakkutuuisa sorsunnermut atatillugu tigusaasa pineqarsimanerat pillugu perulluliortoqarluni.
Aamma Inatsisartut nunanut allanut ataatsimiititaliaani ilaasortat tamakkerlutik najuutinngillat. Ilaasortammi pingasut timmisartorsuup Norsap ajutuutsiarnera pissutigalugu kingusinaarput.
Atlantikup Avannaani Suleqatigiit ukiunik tallimanngortorsiorlutik nalliuttorsiornerannut atatillugu ataatsimeersuarnermik aaqqissuussineq taamaalilluni aallartilluarpallaanngilaq.
Oqalugiartut tamarmik isumaqatigiissutigaat Qalasersuaq ilippanaateqarluinnartuusoq soqutiginarluinnartuusorlu.
Matumani apeqqutaaginnalerpoq qanoq atorluarneqarsinnaanersoq pissutsinullu nutaanut qanoq piareersartoqassanersoq, soorlu silaannaap allanngoriartornerata kingunerisassai eqqarsaatigalugit.
Nalunaaquttap akunnerisa tallimaata affaani oqallissaarisoqareersorlu Høgni Hoydal-ip Atlantikup Avannaani Suleqatigiinneersup oqaatigaa, ataatsimeersuarneq tassaasoq Atlantikup Avannaata sammineqarnerulernissaanut alloriarneq siulleq. Tassa ataatsimut isumannaatsuunissaq eqqarsaatigalugu. Soorlu Kuupik Kleistip oqaatigisaatut – kikkut tamarmik Atlantikup Avannaanut Qalasersuarmullu soqutiginnipput - tamatumunngali atatillugu akisussaaqatigiinnissarput amigaataaginnarpoq.
