Akissutit naammagineqanngillat

Apeqqutit Air Icelandimut tunngasut Inatsisartut Aningaasaqarnermut Ataatsimiititaliaata Naalakkersuisut siulittaasuannut tunniussai, ullunik qulingiluanik kingusinaarlutik kiisami akineqarput. Akissutilli ataatsimiititaliami ilaasortat ilaannit naammagineqanngillat.

- Akissummik taassallugu ingasappallaarujussuassaaq. Tassami Naalakkersuisut siulittaasusata siusinnerusukkut allagarisimasani innersuussutigiinnarmagit. Taamatut uteqattaartitsineq atorsinnaanngilarput,Aningaasaqarnermut Ataatsimiititaliami ilaasortaq, Per Berthelsen, Siumumeersoq taama oqarpoq.

Air Icelandimut isumaqatigiissusiorneq Nunatta namminiilivinnissaanut ungasillisaataassasoq, Aningaasaqarnermut Ataatsimiititaliami ilaasortaasimasup Aqqaluaq B. Egedep, Inuit Ataqatigiinneersup, januaarip 20-anni Radioaviisimut oqaatigaa.

Tamatuma kingorna Air Icelandimut isumaqatigiissusiorsimanerup atorunnaarsinneqarnissaa, Aningaasaqarnermut Ataatsimiititaliap tamarmiusup piumasaralugu Naalakkersuisunut apeqquteqaatigaa.

Pisup ingerlanerani Aningaasaqarnermi Ataatsimiititaliami ilaasortat pingasut taarserneqarput, ilaatigut siulittaasoq, Naaja Nathanielsen Olga P. Berthelsenimit taarserneqarluni.

Naalakkersuisut suliaminnik paarlagaannerisa kingorna, Air Iclandimut isumaqatigiissut oqaaseqarfigerusunneqanngilaq, tassalu aatsaat ullumi siullerpaamik Naalakkersuisut siulittaasuat, Kuupik Kleist apeqqutinut akissutinik ataatsimiititaliamut nassiussaqarluni.

Aningaasaqarnermut Ataatsimiititaliami ilaasortat ullaatungaa ataatsimiipput. Tamatuma kingorna ataatsimiititaliap siulittaasua, Olga P. Berthelsen radioaviisimut ima oqarpoq.

- Naalakkersuisut siulittaasuat qanoq akissuteqarsimanersoq tusagassiorfitsigoorlugu oqaluttuarisinnaanngilara.

Taassuma ilanngullugu oqaatigaa Aningaasaqarnermut ataatsimiititaliap Naalakkersuisunik arlalinnik, Air Icelandimut tunngasumik ualeru ataatsimeeqateqassallutik.