Ilinniakkamik aallartitsineq: Akissutissarsisimanerlutit e-boksimi takussavat

Danmarkimi ilinniarnissamik qinnuteqartorpassuit qinnuteqaatiminnut akissutissarsisimanerlutik e-boksip misissornissaa puigortarpaat. Aamma immikkut tapiissutinik qinnuteqaateqarnissaq eqqaamaneqartussaavoq, Kalaallit Illuutaanni ilinniartunik ilitsersuisoq taama oqarpoq.
Assi © : KNR
aggustip 07-at 2017 07:30
Nutserisoq Simon Uldum -

Danmarkimi ilinniarnissamik qinnuteqarsimasut ilinniakkamut ilinniakkanulluunniit arlalinnut qinnuteqaatimik akuerineqarsimaneranik itigartinneqarsimaneranilluunniit juulip 28-ani akissutissarsipput.

Akissutissarsinissarli qinnuteqartut amerlanersaannit sivisuumik utaqqineqartaraluartoq amerlaqisut akissutissarsisimanerlutik e-boksip misissornissaa puigortarpaat. Aamma akuerineqarsimagaluarlutik Danmarkimi ilinniartuuffissamut Kalaallit Illuutaannullu ilinniarnissap akuerinissaa qinnuteqartorpassuit puigortarpaat.

- Akisssutissarsisimanerluni e-boksip misissornissaa ilinniarnissallu akuerinerata ilinniarfissamut nalunaarutiginissaa pingaaruteqarpoq. Ilinniarnissamut akuerineqarsimaneq atuaannassallugu naammanngilaq, Københavnimi Kalaallit Illuutaanni ilinniartunik ilitsersuisoq, Pia Rosing Heilmann, taama oqarpoq.

Ilinniarfissamut akuersinermik nalunaaruteqarnissamut piffiussaliussat ilinniarfimmit ilinniarfimmut assigiinngitsuusarput. Ilinniarfiit arlallit piffissaliussaat qaangiutereerput, allalli piffissaliussaat aggustip ingerlanerani qaangiutissallutik.

Immikkut tapiissutinik kingusinaarlutik qinnuteqartartut amerlasut

Kalaallit Danmarkimi ilinniagaqartut aamma Namminersorlutik Oqartussanit immikkut tapiissutinik pissarsisinnaatitaapput, ilaatigut Danmarkimut angalanermut aningaasartuutinut akiliunneqarlutik. Immikkut tapiissutinik tunineqarnissamik qinnuteqarfissaq marsip aallaqqaataanut killeqarpoq.

Ajoraluartumilli amerlasoorpassuit ilinniarnissamut qinnuteqaatimik akuerineqarnerani aatsaat immikkut tapiissutinik qinnuteqaateqartussaallutik eqqaasarpaat. Tamannalu Københavnimi Kalaallit Illuutaanni ilinniartitaanermut immikkoortortaqarfimmi ulapputigineqartupilussuuvoq.

Kingusinaartumik qinnuteqaatigineqartut suliarinissaat maannakkorpiaq ulapputigineqarpoq.

- Amerlasoorpassuit immikkut tapiissutissat piffissaatillugu qinnutiginissaat puigorsimavaat, taamaammat qinnuteqaatit pissarsiarisagut tamaasa suliarinissaat maannakkorpiaq ulapputigaarput. Qinnuteqartut ilaannut nukingernartupilussuuvoq, ilinniarnertimmi erngiinnaq aallartittussaavaat angalanissaminnullu billetsissaminnik massakkorpiaq pisariaqartitsillutik, Pia Rosing Heilmann oqarpoq.

Akuerineqarsimanngikkaluaruilluunniit akissuteqassaatit

Københavnimi Kalaallit Illuutaata kalaallit Sjællandimi nunanilu allani ilinniarnissamut akuersineri maannamut 188-it pissarsiarisimavai.

Danmarkimilu Kalaallit Illuutaasa ukioq manna januaarimilu ilinnialertussat qasserpiaanersut suli oqaatigisinnaanngikkaluaraat, kalaallit ilinniarnissamut akuerineqartut procentinngorlugit amerlassusaat qaffasippoq, Københavnimi Kalaallit Illuutaat taama ilisimatitsivoq.

Qinnuteqartulli itigartinneqarsimasut imaluunniit ilinniarfissamut stand-byeqqasut ilinniarfimmut Kalaallit Illuutaannullu saaffiginninnissaat pingaaruteqarpoq.

- Ilinniarfissamut stand-byeqqatinneqaraanni, qinnuteqartoq akuerisaariataassagaluarpat immikkut tapiissutinik qinnuteqaatissaa piareersimasuutigisariaqarparput, Pia Rosing Heilmann taama oqarpoq.

Ilinniarnissamullu itigartivissorneqarsimagaanni Kalaallit Illuutaata ilaanni ilinniartunik ilitsersuisumut attaveqarnissaq aamma pissutissaqarluarpoq.

- Ilinniarusutamut akuerineqarnissaq amerlasuutigut suli periarfissaasarpoq, Danmarkimi sumiiffimmi allami ingerlatiinnarlugu. Tamannalu pillugu ilitsersuisinnaavugut. Qinnuteqarfigisamummi tassungarpiaq periarfissaarukkaluarluni allami immaqa periarfissaqarsinnaavoq, Pia Rosing Heilmann KNR-imut taama oqarpoq.