Akissut naammagigaluarlugu amigaateqarsoraa
Danmarkimilu naalakkersuisut misissuisussanik pilersitsisimammata Atassutikkut ilaasortaatitaat neriulluarput, taamaattorli:
- Apeqqutitsinnut atatillugu akissuteqaatit naalakkersuisup Kim Kielsenip sammisimasai apeqqutitsinnut attuumassuteqanngitsut annertoorujussuit saqqummiunneqarsimapput, soorunalimi aamma qujassutigissavagut. Mittarfeqarfiit nakkutigilluarneqarnerat oqaatigimmagu qularutiginngilarput taamaassimassasoq, kisianni dokumentarfilmimi saqqummiunneqarsimasumut sanilliullugu timmisartuussisarnernut tunngatillugu nassuiaatigineqarsimasut amigaateqarput, kisianni naalakkersuisut Danmarkimi naalakkersuisunut saaffiginnissuteqarsimammata taakkulu ataatsimiititaliamik sulisussanik pilersitsereersimammata neriulluarluta utaqqissaagut, Augusta Salling oqarpoq.
Timmisartuussinerit naalakkersuisut akissutaanni assersuutigineqartut 2006-imeersuupput, timmisartut CIA-mit atorneqartut pingasut Narsarsuarmut taamanikkut aqqusaarsimammata, 2003-mili amerlanerusimammata taakku assersuutigineqarsinnaannginneramik?
- Taamatut isikkoqarpoq, taamaattumik aamma pingaaruteqarpoq qulaajaasussat paasissutissallu piginngitsoorsinnaannginnamikkit naatsorsuutigilluinnarparput paasissutissanik ersarissunik peqarlutik sulilluarumaartut, Augusta Salling oqarpoq.
CIA-lli Kalaallit Nunaata silaannartaanik atuiunnaarsimanissaa qulakkeersinnaanngikkitsik Augusta Sallingip erseqqissaatigaa, oqallittoqarneralli kingunerisaanik mianersortoqarnerulersimanissaa qularutiginngilluinnarpaa.
