Akissarsitinneqartussamik nassaarnissaq ajornakusoorpoq
Avatangiisinik Pinngortitamillu Mianerinninneq pillugu Akissarsisitsinissamut piffissarititaq aappassaanik sivitsorneqarpoq - tamatumuuna decembarip ulluisa arferngata tungaanut.
Sineriassuatsinni innuttaasut akissarsitinneqartussamik siunnersuuteqarnissaminnut periarfissaat taamaalilluni sivitsoqqinneqarpoq. Kinaluunniit innersuunneqarsinnaavoq, akissarsitinneqarnissamut piukkunnaateqarpat:
Tassa imaappoq, inuinnaat, suliffeqarfiit kattuffiilluunniit avatangiisitsinnik pinngortitamullu tunngasunik immikkut iliuuseqartut, imaluunniit avatangiisit pinngortitarlu pillugit ilisimaarinninnerulersitsisut Namminersorlutik Oqartussanit akissarsitinneqarsinnaapput.
Taamaammat Nunamut Namminermut, Pinngortitamut Avatangiisinullu Naalakkersuisoqarfik kaammattuivoq, inuit innersuussinnaasaminnik kingumut eqqarsarlualaaqqullugit, innersuunneqartullu aqqa Naalakkersuisoqarfimmut kingusinnerpaamik decembarip ulluisa arfernganni tunniunneqareersimassaaq.
Nittartakkami www.nanoq.gl-imi annertunerusumik paasisaqarsinnaavusi.