Akissarsisussamik ujaasineq sivitsorneqarpoq
Avatangiisinut pinngortitamullu mianerinninnermut akissarsisinneqartussanik Nunatsinni piukkunnartoqarpallaarunanngilaq. Sullivimmik tarnikkut atukkatigut pitsaanerpaanik atugassaqartitsisumik toqqaanissaq maanna aappaagumut kinguartinneqarpoq.
Allattoq Elisa Isaksen
novembarip 26-at 2011 14:30
Namminersorlutik Oqartussat Avatangiisinik Pinngortitamillu Mianerinninneq pillugu akissarsisitsinissaminnut innersuussiniartunut killiliussaat, innersuunneqartut ikippallaarnerat pissutigalugu qanittukkut sivitsorneqarpoq.
Sullivinni Avatangiisinut siunnersuisoqatigiit maanna aamma taama inissipput. Ukiormanna sullivinni avatangiisinut pitsaanerpaamik atugassaqartitsisutut innersuussat pingasuinnaat tiguneqarput. Sullivinni tarnikkut atukkatigut pitsaanerpaanik atugassaqartitsisut ukiormanna immikkut isiginiarneqarput.
Tamanna pissutigalugu innersuussinissamut killiliunneqartoq aappaagu marsip aallaqqaataannut kinguartinneqartoq, Sullivinni avatangiisinut siunnersuisoqatigiit nalunaarput.
