Akissarsiat qaffanneqarnissaat ujartorpaat
Tallimanngornermilu maajip 30-ianni akunneq ataaseq oqallittoqareersorlu inerniliineq ersarippoq:
- Akissarsiavut annikkippallaaqaat!
Sermitsiap nittartagaani tamanna atuarneqarsinnaavoq.
Taamaattumik ikaarsaariarnermut ataatsimiititaliap siulittaasua Asii Chemnitz Narup, Inuit Ataqatigiinneersoq, peqqunneqarpoq naalakkersuisunut sakkortuunik allagaqaqqullugu akissarsiat qaffannissaat piumasaralugu, tamannalu pissasoq kingumut atuutilersumik maajip aallaqqaataaniit.
Tamatumunnga tunngavilersuutaavoq kommunit kattunnerat kommunimi politikerinut annertunerusunik suliassaqartitsilerlunilu akisussaaffeqalersitsisimammat. Inatsisartut ukiakkut ataatsimiinnerminni akuersissutigaat ikaarsaariarnermi ataatsimiititaliat sisamat kommunalbestyrelsini 18-ini ilaasortatut akissarsiaqassasut.
Borgmester Nikolaj Heinrich, Siumut, oqaluttuarpoq 2006-imi ataatsimiititaliami ilaasortaannartut politikkimik sulinermini akunnermusiani 26 koruuninut naatsorsorsimallugu.
- Kommunimi politikerit tamarmik assigiissumik atugassaqarput, inuussutissarsiortunullu namminersortunut akissarsianik immikkut ittunik eqqussisinnaanngilagut.
Akerlianik Nikolaj Heinrichip nuannaarutigisinnaavaa 2009-mi qaammatini siullerni sisamani borgmesteritut akissarsiaqarsinnaagami imatorsuaq sulinani.
