Akissarsiat pillugit isumaqatigiinniarnerit arlallit aallartilerput

Allattoq Mads Lynge
aggustip 02-at 2006 17:32

Akissarsiat qaffatsinneqarnissaannut sulinermilu atugarisat pitsanngorsarneqarnissaannut sorsuutiginninnissamut, aasarsioreernerup kingorna piffissanngoqqippoq. Sulinermik inuussutissarsiuteqartut kattuffiisa peqatigiiffiisalu, ilaasortamik akissaataasa sulinermilu atugaasa pitsannguutissaat pillugit Namminersornerullutik Oqartussanik isumaqatigiinniarnitik ukiap ingerlanerani nangillugillu aallartissavaat.

Nunatsinni sulinermik inuussutissarsiuteqartut kattuffiisa angisuut, SIK-p aamma ilinniartitsisut kattuffiata IMAK-ip Namminersornerullutik Oqartussanik isumaqatigiinniaqateqarnitik qaammammi matumani nangissavaat.

Illuatungeriit kissaatitik piumasatillu saqqummiutereerpaat, aningaasartassaanulli tunngasut suli inissivinneqanngitsut, Namminersornerullutik Oqartussat isumaqatigiinniartitaasa pisortaat Gitte Arvegaard ilisimatitsivoq. IMAK-imik SIK-millu isumaqatigiinniarnerit nangeqqinnissaat suli aamma ullulerneqanngilaq.

SIK-mik IMAK-imillu isumaqatigiinniarnerit maannamut kinguneqarluartumik ingerlasimasut, Gitte Arvegaard isumaqarpoq.

Peqqissaasut Kattuffiata ilaasortaminik isumaqatigiinniussinera septembarimi aallartissaaq, illuatungeriillu piumasaqaatiminnik kissaatiminnillu saqqummiussaqareerput.

Atorfillit kattuffiata AK-p ilaasortami akissaataat sulinermilu atugaanik qaffaanissaq pitsanngorsaanissarlu pillugit isumaqatigiinniarneri aamma septembarimi aallartissapput. AK-mit Namminersornerullutillu Oqartussat tungaannit piumasaqaatinik kissaatinillu suli saqqummiussaqartoqarsimanngilaq.

Radiotelegrafistit Peqatigiiffiata, ilaasortani Tele-mi teknikerit og timmisartoqarfinnilu AFIS-operatørit akissaataannik isumaqatigiinniussinera novembarimi aallartissaaq, tassanilu illuatungeriit kissaatiminnik piumasaminnillu suli saqqummiussaqanngillat.