Akissarsiat nalunaarsorneqartalissapput

Nunatsinni akissarsiat tamakkiisumik nalunaarsorneqartalerniassammata Sulisitsisut peqatigiiffiat GA Naatsersueqqissaartarfillu suleqatigiissutigiillutik iliuuseqarnialerput.

Akissarsianik nalunaarsuinerit suliffeqarfinni assigiinngitsuni akissarsiat ineriartornerannik takussutissiissarput, nunatsinnilu aningaasaqarnerup ingerlanera malinnaaffigineqarsinnaalluni, Sulisitsisut peqatigiiffianni pisortaq Ole Rud oqarpoq. Isumaqarporlu akissarsianik nalunaarsuineq piffissaq ungasinnerusoq isigalugu nunatsinni suliffeqarnermut politikkimut sakkussaalluassasoq.

Aallartisarnerani Sulisitsisut peqatigiiffianniit sanaartornermik suliallit suleqatigineqassapput, taakku ukiuni kingullerni tallimani akissarsiat ineriartornerannik misissuisimagamik.

Misissuinerup inernera nalunaarusianngorluni aasaru juulimi saqqummiunneqassalluni.

- Akissarsianik nalunaarsuisarneq piviusunngussappat, pisariaqarpoq suliffeqarfiit akissarsianik elektroniskimik allattuisalernissaat, Naatsorsueqqissaartarfimmut nassiunneqartalerniassammata, Thomas Mogensen, Sulisitsisut peqatigiiffianni aningaasaqarnermut siunnersortaasoq oqarpoq.

Aallaqqaammut immersugassat pingasut akissarsianut, sulinngitsoornernut ilinniarnermullu tunngasut suliarineqassapput.

Taakkulu naammasineqarsimassappata akissarsianik nalunaarsukkat ukiut pingasut tallimallu akornanni qaangiuppata piviusunngorsinnaalissapput.