Akissarsiat isumaqatigiissutigaat

Aningaaseriviit Kattuffiat Kalaallit Nunaannilu Sulisitsisut Peqatigiiffiat sapaatip akunneri arlallit aningaaserivinni sulisut akissarsiaat pillugit isumaqatiginninniareerlutik nutaamik isumaqatigiissuteqarput.

Isumaqatigiissummi allassimasut malillugit aningaaserivinni sulisut akissarsiaat ukiumut 2,5 procentimik qaffattassapput, sulinngiffeqarnermi ajunngitsorsiassat procentip affaanik amerleriassapput kiisalu sulisitsisut soraarnerussutisiassanut akiliisarnerat 0,75 procentimik qaffariassaaq.

Isumaqatigiissusiortoqarnerani suliumajunnaarnissaq atorunnaarsinneqarpoq.

Isumaqatigiissummi sulisut atugarisaat pitsanngorsarneqassasut aamma allassimavoq. Sulisut ukiut tallimakkaarlugit tamarmik sulinngiffeqarnerminni angalatinneqartarnissaat ilaatigut qulakkeerneqartut ilagaat.

- Isumaqatigiissutigisarput iluarisimaarpara. Isumaqatiginninniarnerit akaareqatigiissumik ingerlanneqarput. Tamattalu iluarisimaakkatsinnik angusaqarsimasutut misigisimavunga. Ilaasortatta atugarisaat arlalitsigut malunnaatilimmik pitsanngoriassapput, siulittaasup tullia Kent Petersen oqarpoq.