Akissarsiat assigiinnginnerujussuat politikerinit oqaluuserineqarumavoq
Naatsorsueqqissaartarfiup kisitsisaataasa takutippaat arnat angutillu akissarsiaat 40 procentinik assigiinngissuseqartut, tassa arnat angutinut sanilliugit 5.000 koruuninik qaammammut akissarsiakinnerusartut.
Akissarsiat assigiinnginnerujussuat Inuit Ataqatigiit sinnerlugit inatsisartunut ilaasortamit Naaja Nathanielsen aamma akueriuminaatsinneqarpoq.
- Arnat sulisussatut piukkunnaannerunngillat aamma suliaminnut tunniusimanerat angutinut sanilliullugu appasinnerunani, Naaja Nathanielsen oqarpoq.
Taanna isumaqarpoq arnat kattuffitik aqqutigalugit naligiissitaanissamut suleqataanerusariaqartut
- Akissarsiat tungaatigut assigiinngissutsip kinguneranik arnat aamma utoqqalinersiakinnerussapput, utoqqalinerminnilu aamma akissaatikinnerullutik inuussallutik, tassa arnaanertik pissutigalugu, Naaja Nathanielsen oqarpoq.
Naligiisitaanermut ataatsimiititaliap siulittaasuata Poul Hansenip
akissarsiat assigiinnginnerat pillugu misissorneqarnissaannik oqariartuuteqarnera, Naaja Nathanielsenip tapersersorpaa, paasisammi tunngavigalugit iliuuseqartoqarsinnaanngussammat.
