Akissarsiat akinut naleqqussarnissaat SIK-p piumasaraa
Namminersorlutik Oqartussat pigisaanni akit qaffattarneri, Sulinermik Inuussutissarsiuteqartut Kattuffiata, SIK-p, ilaasortaasa akissarsiaasa qaffannerannut aamma kinguneqartassasoq, SIK-p siulittaasuata Jess G. Berthelsenip piumasaraa.
Allattoq Niels Krogh Søndergaard, Sivert Olsen
februaarip 18-at 2014 05:17
Royal Arctic Linep assartuinermi akinik qaffaanissaa, Naalakkersuisut tallimanngormat akuersissutigaat:
- Maannakkorpiaq naatsorsoruminaappoq oqaatigiuminaallunilu pisiniarfiit qanoq annertutigisumik qaffaassanersut tamatuma kingunerisaanik, kisianni qularnanngilaq ukiup naanerani takuneqarsinnaanngussaaq qanorpiaq sunniuteqarsimanersoq. Kisianni taakkua aamma arlaatigut sillimaffiginiarlugit taava assersuutigalugu maannakkut pisortanut isumaqatigiinnialerutta piumasaqaatissavut qaffaallattariaqassavavut, SIK-p siulittaasua Jess G. Berthelsen, oqarpoq.
Royal Arctic Line assartuinermi akinik 5 procentinik marloriarluni qaffaassaaq, tassa ukioq manna aappaagulu 2015-imi aamma qaffaassalluni.
