Akissarsiat ajornartorsiutaanavianngillat
Oqaatsit atorneqartut ilaat tassaakkajupput akissarsialutsitsineq, akissarsianik appasitsitsineq oqaatsillu kusanannginnerit allat atorneqartarlutik. Nunatsinni politikkerit aamma isummersorput, sapaatillu akunnerata siuliani Inatsisartut tamanna pillugu oqallisigaatsiarput.
-Isukasiani aatsitassarsiorfimmi suliumaartussat akissarsiassaat pillugit maani akissaatit pillugit piumasaqaatigineqartunut naapertuuttorujussuusut isumaqarpunga. Takorluukkavut eqquutissappata piumasaqaatit naammassisinnaallugit isumaqarpugut. Suleqatitsinnut piumasaqaativut sakkortusarmata nunarsuup sinnerani aatsitassarsiorfiit akissaatigissaartitsipput. Aatsitassariornermi pissutsit marluk aalajangiisuusarput; tassalu tunisassiorneq akissarsiallu. Taakku marluk imminnut naapertuukkunik piginnittunut sulisunullu iluaqusiinerussaaq, tamannalu aamma naggataagut nunamut iluaqutaanerussalluni, London Miningip pisortaa Xiaogang Hu oqarpoq.
Nuup Kangerluani suliffissualiorniarnerup Kalaallit Nunarput nunarsuatsinni pingaarutilimmik inississinnaalluarpaa. Nunatsinni politikerit tamanna aamma ilisimaaraat, illuatungeriillu maannamut isumaqatiginninniarneri pillugit London Mining naammagisimaarinnippoq.
-Ataatsimoorluta Kalaallit Nunaat nunarsuarmi suli ersarinnerulersissinnaavarput, neriuppungalu London Miningip Kalaallit Nunaat nukittunerulersissagaa, nunarsuup sinnerani nunamilu maani. Suliassatta aallartinnissaa erinigaarput, piffissarli aamma aalajangiisuulluinnartarpoq. Aningaasaliisuvut naassaanngitsumut utaqqisiinnarsinnaanngilavut. Aningaasaataat maani erniortinneqarsinnaanngippata nunani allani aningaasaliissuteqarnissaminnut piareersimapput, Xiaogang Hu KNR-imut oqarpoq.
