Akissarsiaqqortunerit akileraarnerusalissanngillat
Aksisarsiaqqortunerit akileraarnerusalernissaannut IA kisimi tapersersuivoq.
Tamanna aaqqissutissatut tulluanngitsoq, Siumut, Atassut aamma Demokraatit aamma isumaqarput.
Nuummi isertitaqartut 2011-mi ukiumut agguaqatigiissillugu 284.000 kr-niupput, Qaanaami innutaasut 125.000 kr isertitaqartut
Nunatsinni naatsorsueqqissaartarfiup kisitisit saqqummiussaani tupaallaatigineqarsinnaanngitsumik illoqarfinni najugaqartut isertitaqarnerujussuupput nunaqarfinni najugaqartunut sanilliullugit
Nunaqarfinni tamani isertitat assigiinngissutaat aamma annertoruujussuuvoq
Qeqertarsuatsiaani innuttaasut ukiumut agguaqatigiissillugu 186.000 kr-nik isertaqarput
Qeqertani Qaanaap nunaqarfiani innuttaasut agguaqatigiissillugit 67.000 kr-nik 2011-imi isertitaqartut.
KNR-ip qinersisartunik ataatsimiisitsineranni Ilimmarfimmi ippassaq unnukkut pisumi, akissarsiaqqortunerit akileraarnerusalernissaannut partiit isumaat saqqummiunneqarput.
Nunani killerni nunat amerlanerit piitsut pisuullu assigiinngissutaat annikillisinniarlugu akissarsiaqqortunerit akileraarutinik akiliinerusarput.
Nunatsinni tamanna atorneqanngilaq. Tamannnalu nunatsinni partiit amerlanerit atuutsilersinnianngilaat, naak Kalaallit Nunaani piitsut pisuullu assigiinngissutaat annertoorujussuugaluartoq. Akissarsiaqqortorunik akileraarnerusalernissaannut IA kisiartaalluni tapersuivoq.
Akissarsiaqqortunerit akileraarnerusalernissaannut Siumut isumaqataanngilaq,
- qaffasissumik ilinniagallit ukiorpassuit ilinniagaqarsimasut angusaqarsimanermi kingorna artukkerneqarnissaat kissaatiginngilarput,
Kenneth Rasmussen Siumut sinnerlugu inatsisartunut qinigassanngortittoq taama oqarpoq.
Namminersorlutik suliffiuteqarsinnaaneq pilerinarsartuartariaqarparput taakkualu isertitaqqortusippata aningaasanik allerfigineqartariaqanngitsut , Atassut sinnerlugu inatsisartunut qinigassanngortittoq Ove Thomassen oqarpoq.
Demokraatit partiiat akissarsiaqqortunerit akileraarnerusalernissaannut akerliunertik erseqqissumik saqqummmiuppaat
- tamassuma isumaqatigiinniutaasinnaaneraluunniit eqqarsaatigisinnaanngilarput isumaqatiginngingaaratsigu, Demokraatit partiiat sinnerlugu inatsisartunut qinigassanngortittoq Anda Uldum oqarpoq.
Partii Inuit akissarsiaqqortunerit akileraarnerusalernissaannut isuma suli aalajangiiffiginngilaat inatsisartunili tamanna oqaluuserineqartariaqartoq
- Torersumik sukumeeqqissaartumillu suliassat taamatut ittut inatsisartuni oqaluuserineqartariaqartut Partii Inuit isumaqarpoq, Nikku Olsen inatsisartunut qinigassanngortittut Ilimmarfimmi ataatsimiitinneqarneranni taama oqarpoq.
Kattusseqatigiit Partiiat akissarsiaqqortunerit akileraarnerusalernissaannut isummamut suli aalajanginngilaq, nalilersorneqartariaqartorli, Kattusseqatigiit Partiianni siulittaasoq Anthon Frederiksen oqarpoq.
