Akissarsianik qaffaanissamut tunuarsimaartalernissaq assortuussutaavoq

Naalakkersuisut aningaasaqarnikkut ingerlatsineq pillugu nalunaarutaanni aningaasarsiat assigiinnginnginnerat nalimmassarneqartariaqartoq tikkuarneqarpoq, tamannalu ilaatigut akissarsiat kattuffinnut isumaqatigiinniutigineqarneranni pisortat aningaasanik tunniussinissaminnut tunuarsimaarnerusalernissaat pisariaqarnerarneqarpoq.

Tamannali sulisartut ilinniagartuullu kattuffiisa isumaqatiginngilluinnarpaat.

- Ilaasortatta pisissutigisinnaasaat milleriarsimanerat eqqaamasariaqarpoq, piffinni ataasiakkaani kallerup innera kiassarnerlu qaffakkiartorsussaammata. Sulinermik Inuussutissarsiutillit Kattuffianni siulittaasoq Jess G. Berthelsen oqarpoq.

Nalunaarummi aamma tikkuarneqarpoq, kattuffiit nassuerutigisariaqaleraat, aningaasatigut periarfissakimmat kattuffiit piumasatik killilertariaqaleraat.

- Namminersornerullutik Oqartussat aamma suleqataasinnaapput. Inissianik atuisuuvugut, kallerup innera kiassarnerlu aquppaat, taamaattumik tassuuna appartiterinikkut ilaasortatta aningaasarsiaasa pisissutigineqarsinnaanerat pitsanngorsaavigisinnaavaat. Jess G. Berthelsen tunngavilersuivoq.

Aamma isumaqatigiinniarnerni pingaaruteqarluinnartutut aamma taavaa, Naatsorsueqqissaartarfiup sukkanerusumik sulisariaqalernera, Unammilleqatigiinnermut Ataatsimiititaliap minnerunngitsumillu Atuisut Siunnersuisoqatigiivisa akinik nakkutilliinermi uparuaasinnaanissaat qulakkeerniarlugu.

- Suleqataarusuppugut, suleqataassaguttali piumasarissavarput, aningaasarsiatta pisissutigineqarsinnaanerat pitsanngorsarneqarnissaat Jess G. Berthelsen erseqqissaavoq.

Nunatsinni ilinniagartuut kattuffianni siulittaasoq Flemming Guntofte Nielsen Naalakkersuisut oqariartuutaannut tupaallassimanerarpoq, erseqqissaatigaalu, pisortat qangalilili tunuarsimaartalereersimasut, tamannalu allanngortittariaqartoq, pisortat atorfiit pilerinartuunissaat qulakkeerneqassappat.

- Ilinniarneq akisussaaffeqarnerlu akilerneqartariaqarput aamma suliffimmut tunniussisinnaaneq ingerlaqqiffiusumillu ilinniagaqarneq akilersinnaasariaqarput. Flemming Guntofte Nielsen tunngavilersuivoq.

- Inuuniarnermi akit qaffasipput, taamaattumik assersuutigalugu angallannermi akit qaffappata imaluunnit niuertarfimmi sulisut akissarsiaat qaffappata nioqqutissat akiinik piginnittoq aamma qaffaassaaq, taamaattumik qaffassaaniarnerinnavik aqqutissatut kisiat isigigutsigu isumaqarpunga isumaliorluartariaqalersugut. Kattuffiit qisuariaataat pillugit Aningaasanut Naalakkersuisoq Inuit Ataqatigiinneersoq Josef Motzfeldt oqarpoq.

Sulisitsisut, sulisartut aamma Namminersornerullutik Oqartussat isumaqatigiinniarnerni ataatsimoorlutik naleqqersuussisalernissaannik isuma nalunaarummi allaaserineqartoq SIK-p aamma Ilinniagartuut ilassilluarpaat.