Akissarsiami qaffariaataat sullugaat
- Taamatut isumaqatigiissuteqarneq sulisitsisut tungaannit naalakkiineruvoq, aamma taamatut pissusilersorneq magisterit isumaqatiginninniartuinit akueriinnarneqarpoq, magisterit sinnissaat Nikoline Ziemer oqarpoq.
Qaffasissumik ilinniarsimasut arlallit peqatigiiffimmi Dansk Magisterforeningimi ilaasortaapput, ilaatigut ingeniørit, illussanik titartaasartut inatsisilerituullu ilaasortaallutik.
Isumaqatigiissutip inernera ilaasortat akornanni tikkuussisumik taasisitsinikkut naliginnaasumik akuerineqaqqaartarpoq.
Kingullermilu isumaqatiginninniartoqarnerani ilaasortat qarsutiinnarlugit siulersuisut akornanni pissusilersortoqarsimanera, Nikoline Ziemerip isornartorsiorpaa.
Akissarsiat pitsanngoriaataat isumaqatiginninniarnermi assortuussutaavoq.
Magisterit ukiuni marlunni akissarsiassaat 3,33 procentimik qaffassapput. Taamaasillunilu qaffariaat annikitsuinnaalluni.
Taakkunannga 2,86 procentit tamanut atuupput, sinnerilu Namminersorlutik Oqartussani aqusisut akissarsiaannut qaffaataassallutik.
Kisianni akissarsiat 2,86 procentimik qaffariarnerat akit qaffariartornerannut sanilliullugu annikippallaartoq, Nikoline Ziemer isumaqarpoq.
- Pissutsit taamaaginnassappata ilaqutariit meerartallit eqqorneqassapput, tassami meeqqerivinnut akiliutit qaffariagaatsiarnikuummata, magisterit sinnissaat taama oqarpoq.
