Akissarsialeriffimmi ajutoorneq akissarsisitsinermut sunniuteqarsinnaavoq
Aningaasaqarnermut sulisoqarnermullu aqutsisoqarfik tusagassiuutitigut nalunaarummini taama allappoq.
Aqutsisoqarfimmiit Hans Jørgen Mørchip oqarnera naapertorlugu ajutoornerup, pingaartumik nal. akunneranut akissarsiallit, akissarsiaannik ingerlatitsineq kiisalu inunnut ataasiakkaanut feeriaqarnersiutissat tunniunneqarnissaat eqqorneqassapput.
Namminersorlutik Oqartussani, politiini, eqqartuussivinni, amutsivinni, inatsisartut allattoqarfianni, Asiami Rigsombudimilu nal. akunnermusialinnut aqagu akissarsiat siumoorutaat tunniunneqassapput, nal. akunneri suliffigisimasat nal. akunneranut akissarsiarineqartumut naleqqiunnerat tunngavigalugu. Akissarsiani aallaaviatigut aalajangersimasumik ilanngaat naatsorsorneqassaaq.
Sulinermilli inuussutissarsiuteqartunut eqqorneqartunut tuppallersaatissaqarpoq. Akissarsiat siumoorutit akissarsisassaviillu assigiinngissutaat naatsorsorneqassaaq, ataasinngornermilu 1. februar 2010-mi tunniunneqariissallutik.
Taavalu Kommuneqarfik Sermersuumi sulisunut immikkut nalunaarutissaqarpoq: Taakkua akissarsiaannik ingerlatsineq unnugu unnuarulu ingerlanneqassaaq taamaalillutik taakku tamarmik aqagu piffissaq eqqorlugu akissarsiniassammata.
Nunatsinni kommunit allat pingasut ajutoornermit sunnerneqassanngillat.
Ajutoornermut tamarmut pissutaavoq, ippassaq sarfamik qamittoornerit marlussuit, taamaattoqarneratigullu akissarsialerivimmut nassiussisarfik filillu paasissutissartallit kiisalu toqqorsiviit assorsuaq ajoqusersimanerat.
