Akissarsiakinnerit pilliutigineqassapput
Neqit nunanit allaneersut nunatsinni tuniniarneqartarnerani akitsuuserneqartariaqarnerarlugit siumummersup Doris Jakobsenip siunnersuutaanut Demokraatit akerliupput.
Demokraatineersoq Per Skaaning oqarpoq neqit nunanit allaneersut akitsuusersorneqassappata nunatsinniittut pissakinnerit eqqugaanerpaassasut isumaqarpoq.
Neqinik nioqqutissanik eqqussuinermi akitsuusersuisoqassappat qanoq inuiaqatigiinnut eqquitigissanersumik 2003-mi naalakkersuisut nalunaarusiortitaanni erserpoq, neqit akitsuusersorneqassappata akissarsiakinnerusut eqqugaanerpaassasut, nunatsinni akissarsiakinnerit nunanit allaneersunit neqinik pisiortornerusarmata.
Per Skaaning isumaqarpoq akissarsiat ikilerujussuassasut, tamassumalu kingunerissagaa akissarsiat pillugit isumaqatigiinniarnermi naalakkersuisut piumasaannut akerliusumik akissaatit amerlinissaat kissaatigineqassasoq.
Per Skaaningip aamma eqqaamaneqaqquaa Islandimi pisiassat nunarsuarmi akitsuusersugaammata akisunersat ilagigaat.
Nersussuup neqaa kilumut 10 kronimik kiisalu puulukip neqaa 2,25 kroninik akitsuusersugaapput, tassalu Doris Jakobsenip suli akitsuusersueqqinnissaq kissaatigaa.
