Akissaqartoqarpat Diskobugtimi annaassiniartoqalersinnaavoq
Diskobugtimi timmisartumik annaassiniarsinnaalernissamik sulissuteqarniarneq minnerpaamik qaammatini marlunni piareersarfiussaaq. Diskobugtimi timmisartumik annaassiniartartussaqannginnerata oqallisaaqqilernerat atatillugu Air Alphami pisortat taama ilisimatitsipput.
Air Alpha-p timmisartuutai kivitsissuteqanngimmata ilinniarsimasunillu sulisussaqannginnami annaassiniartussaqarneq ajorpoq, Air Alphap pisortaata tullia Ole Dorph oqarpoq.
Ilulissani angutip 21-nik ukiullip sap.ak. siuliani ujaarineqarnera oqallinnermut aallarmiutaavoq. Ujaasineq ulloq unnuarlu ingerlanneqareersoq ujarneqartoq Air Alphamit takuneqaraluarpoq, kivitsissuteqanngimmalli qaqinneqarsinnaasimanngilaq, kingusinnerusukkullu nakkutilliissummit Appamit takusarneqaraluarami nassaarineqanngilaq.
Ole Dorph oqarpoq annaassiniarbermi atortut 1 mio. kr.-ngajannik akeqassasut, ukiumullu ingerlatsineq 2 mio.kr.-gajassasut. Aningaasat taaneqartut naalakkersuinikkut aalajangiiffigineqartussaasut erseqqissaatigineqarpoq.
Nunarput tamakkerlugu maannakkut marlunnik annaassiniarsinnaasunik timmisartoqarpoq, tassalu Nuummi Narsarsuarmilu.