Akissaqartoqanngimmat aalisariutit uninngaannarput

Uummannami aalisariutit iluarsagassat ikinnerpaamik 16-it uninngaannarput, iluarsaanneqarnissaallu inuttaasa kissaatigigaluarlugu soriarsinnaanngikkallarput, akiitsoqareernerat pissutigalugu taarsigassarsiniarnerigaluat Namminersornerullutik Oqartussanit itigartitsissutigineqarmat. Pissutsit ilungersunarsilluinnartut Uummannap kommuniani borgmesteri Jakob Petersen naliliivoq.

- Aalisartut aalisariutaat uninngaannarput, taamaattumik qanoq ilillutik akiitsuminnik taarsersuisinnaappat aallarsinnaanatillu ? Jakob Petersen oqarpoq.

Uummannap Kommuneata aalisartut ikiorserniarlugit ilaatigut Aalisarnermut Naalakkersuisoq Rasmus Frederiksen tikeraarmat ajornartorsiutit pillugit saqqummiussivigisimavaa, kingornagullu Namminersornerullutik Oqartussanit atorfilittat februaarimi aamma tikisinneqarput, aalisartut ikiorniarlugit aaqqiissutissanik nassaarniarnissamut ikiuukkiartortinneqarlutik.

Aalisartut taamaalillutik Namminersornerullutik Oqartussanut qinnuteqarput, angallatitik iluarsaatsinnissaannut aningaasanik taarsigassarsinissaq siunertaralugu. Aalisartulli qinnuteqaataat itigartinneqarput, akiitsoqareernertik pissutigalugu.

Aalisarnermut Pisortaqarfimmit ilisimatitsissutigineqarpoq, ullumikkut inatsisit malillugit akiitsullit taarsigassarsisinneqarsinnaanngimmata itigartitsisariaqarsimallutik.

Aalisariutit uninngaannarnerat miserratissaanngitsumik kommunep aningaasaqarneranut sunniuteqaqisut borgmesteri erseqqissaavoq.

- Kialuunnit naatsorsorsinnaavaa, kommunemut akileraarutitigut isertitassaraluit pinngitsoorpata. Taamaattumik pissutsit ilungersunarluinnarput. Jakob Petersen nassuiaavoq.

Namminersornerullutik Oqartussani itigartitsisoqareermat kommune taava qanoq ingerlariaqqissava ?

- Neriuppunga oqaloqatigiinnerit aallartereersimasagut nangeqqissinnaassagigut. Uummannap Kommuneani borgmesteri Jakob Petersen oqarpoq.

Uummannami suliffissaaleqisut katillugit 84-iupput, siorna taamaalinerani affaasa missaanniillutik.