Akissaatikitsut BSU aqqutigalugu akilersuutitaqanngitsumik illoqarsinnaalerput.
Inatsisartut sapaatip akunnerata siuliani aappassaanerinnillutik akuersissutigaat BSU aqqutigalugu akiitsunik isumakkeerinnittarneq atorunnaarsinneqassasoq, taarsiullugulu erniaqanngitsunik attartortoqarsinnaalissasoq.
Tamanna ingammik ukiumut 180.000 kronet inorlugit isertitalinnut iluaqutaasussaavoq, tassa taakkua illutaarniarlutik BSU-mut illumik 700.000 kroninik akilersugassaanngitsumik erniaqanngitsumillu illutaartinneqarsinnaalissasut Ineqarnermut pisortaqarfimmi pisortaq Ulafur Nielsen Københavnimiit radioaviisimut oqarpoq.
Ilaqutariit illu qimalerpassuk nalilersortinneqassaaq, taamaasillunilu 750.000 kroninik naleqarneragaassappat 700.000 kronet Namminersornerullutik Oqartussanut nakkartinneqassapput sinnerilu 50.000 kronet ilaqutaasunut nakkartinneqartussanngussallutik.
Nunaqarfinnili ornikkumaneqarpianngitsuni illu taamaallaat 65.000 kronenik nalilerneqassappat taakkununnga sinneruttut 635.000 kronet ilaqutariit isertitaat malillugit akilersorneqarsinnaanngitsoq uppernarsarneqaraangat sinneri Namminersornerullutik Oqartussanit matuneqaannartassasut Ulafur Nielsen oqarpoq.
Tassa taamaasilluni BSU-mik illuliani inoqutigiit isertitaat malillugit qanoq akilersuisinnaatiginersut nalilerneqartassapput. Taamatuttaaq nammineerluni illuliassat 10 procentiinik nammineerluni akiliisitseriarluni sinnera Namminersornerullutik Oqartussanit matuneqarluni qanoq akilersuisoqartassanersoq, isertitat annertussusaat aallaavigalugit nalilersorneqartassasoq.
Taamaasilluni isertitat aallaavigalugit akilersuisinnaanerit akilersuisinnaannginnerilluunniit aallaavigalugit akeqanngitsumik illoqartoqarsinnaalissaaq ukiortaamiit atuutilersumik.
Taamaasilluni inoqutigiit arlalissuullutik illumi ataatsimi ineqartarnerat pitsanngorsaavigineqassasoq Namminersornerullutik Oqartussaniit neriuutigineqartoq Ineqarnermut pisortaqarfimmi pisortaq oqarpoq.
Nunatsinni illut 4.700-it BSU aqqutigalugu akilersorneqarput, inatsillu nutaaq ukiortaamiit atuutilertussaammat, BSU-mi illullit akiitsoqartullu najugaqarfimminni INI A/S-ip immikkoortortaanut saaffiginnillutik aaqqiissutissaasinnaasunik paasiniaasinnaassasut Ulafur Nielsen oqarpoq.
