Akinik minnerpaaffiliisoqanngippat umiarsualiviit aalisartunit assersorneqariaannaapput
- Nunani allani taamaaliortoqartarpoq, KNAPK-p siulittaasua Leif Fontaine oqarpoq, akinillu minnerpaaffiliisoqarsinnaanngippat aalisartut umiarsualivinnik allatut ajornartumik assersuilersinnaanissaat oqaatigalugu. Taanna aalisarnermut naalakkersuisumik Ane Hansenimik ullumi ataatsimeeqateqarpoq, ataatsimiinnerlu ima oqaaseqarfigaa:
- Minnerpaaffiliinissamut qinnuteqaaterput naalakkersuisut sui tikissimanngimaasuk Ane Hansenip ajuusaarutigaa, tunitsiviusinnaasumilli pinasuartumik umiarsualiisoqarnissaa neriorsuutigaa. Tamanna qujanartorujussuussaaq, saarulleqarluaraluartormi aalisartut tunitsivissaqanngillat, Leif Fontaine oqarpoq.
Aalisakkat akiisa minnerpaaffilerneqarnissaat naalakkersuisunit qularnaarneqarpat aalisarneq inunnik isumaginninnikkut aaqqissuussininnguussanngila?
- Taamatut isumaqanngilanga. Nunammi allat taamaattunik aamma aaqqissuussanik ingerlataqartarput. Nunap aalisarnikkut innarlinnginnissaa matumani anguniagaasarpoq, nunallu unammillersinnaassusiat qularnaarniarneqartarluni, taamaattumik pingaaruteqartorujussuuvoq Nunatsinni siunissami taamatut minnerpaaffiliisoqartalernissaa, KNAPK-p siulittaasua oqarpoq.
Akinik minnerpaaffiliisoqanngippat aalisartut allatut ajornartumik umiarsualivinnik assersuilertariaqarsinnaanissaat Leif Fontainep oqaatigaa.
Aalisarnermut atatillugu inuiaqatigiinni aningaasat kaaviiaarnerisa sunniuteqarneranut misissuisoqartariaqartoq, Aalisarnermut naalakkersuisup radioaviisimut oqaatigaa, aalisartulli umiarsualivinnik assersuilertariaqarsinnaanerat pillugu tusagaqarsimannginnerarpoq.