Akilinermut angallanneq pitsaaneruleqquaat

Nunavummi højskolet siullersaata atoqqaarfissiorneqarnera iluatsillugu, Nunatsinni ilinniartitaanermut Naalakkersuisup, Palle Christiansenip Namminersorlutik Oqartussat sinnerlugit Nunavummi atsioqateqarnera, ICC-mit nuannaarutigineqarpoq. Iluatsissappalli silaannakkut aqqutit pitsaanerulertariaqarsoraat.
Allattoq Apollo Jeremiassen
maajip 09-at 2011 06:13

ICC-mi Nunatsinni siulittaasup tullia, Hjalmar Dahl ima oqarpoq:

- Naggueqatigiit Inuit ilinniartitaanikkut, kulturikkut oqaatsitigullu nukittorsaqatigiittuarnissaat ICC-p pilersinneqarnerani tunngaviulluinnartut ilagaat, inuusuttullu paarlaateqatigiittarneq aqqutigalugu nutaamik periarfissaqalernerat nuannaarutissaavoq.

Taassuma aamma oqaatigaa taamatut paarlaateqatigiittarneq nutaajunngitsoq, ajoraluartumilli suliniutaasartussanik kinguneqartitsisoqartarsimanngitsoq aamma oqaatigalugu.

Tamatumunnga pissutaaneruvoq Nunatsinniit Akilinermut timmisartukkut attaveqarnerit taamaatinneqarnerat, taamaalilluni tasamunga angalaneq akitsorsimalluni.

- Nunatsinni Nunavummilu inuusuttut paarlaateqatigiittarnissannik isumaqatigiissutip Nunatsinniit Akilinermut timmisartukkut ataavartumik attaveqalernissamik kissaatitta pisariaqassusia minnerulersinngilaa. Isumaqatigiissut pitsaasoq siunissami ineriartortinneqassappat aamma angallannikkut naggueqatitsinnut allanullu attaveqarnerput pitsaanerulertariaqarpoq, ICC-p Nunatsinni siulittaasuata tullia, Hjalmar Dahl oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq