Akilinermiut ukiunik 13-inik inuunikinnerupput

Naggueqatigiit Inuit Nunavummi Nunavimmilu najugallit Canadap sinnerani najugalinnut naleqqiullugu ukiunik 13-inik inuunikinnerusartut kisitsisit naatsorsueqqissaartarfimmeersut takutippaat.

Inuit Canadap kujasinnerusortaani najugallit agguaqatigiissillugit 81-inik ukioqalertarput, naggueqatigiillu Inuit agguaqatigiissillugit 67-inik ukioqalertarlutik. Irakimi innuttaasut utoqqaanerulertarput.

Pissutsit qangalili taamaassimasut, naggueqatigiit Inuit kattuffiata Inuit Tapiriit Kanatamip nalunaarutigaa, pitsanngoriartunngitsullu aamma oqaatigineqarluni.

- Inuit inuunerinnerulissappata iliuuseqartoqartoqartariaqarpoq, nutaaliornikkullu eqqarsarluarnikkullu tamanna anguneqarsinnaavoq. Naggueqatigiit Inuit, Canadamilu innuttaasut allat naalakkersuisullu suleqatigiinnikkut tamanna angusinnaavaat, Inuit Tapiriit Kanatamimiit oqartoqarpoq.

Meeqqat naggueqatigiit Inunneersut amerlasuut toqujaartarnerat, Canadap kujasinnerusortaani innuttaasut naggueqatigiinnut Inunnut naleqqiullugu utoqqalinerusarnerannut pissutaasunut ilaavoq.

Piniartillutik ajunaartut amerlapput pujortartartullu aamma amerlallutik, Canadami ilanngutassiortorput Marianne Stenbæk taama nalunaarpoq.