Akilinermiut qanga TB-qartut arlallit nunaminnut uteqqinngisaannarsimapput

Nunarsuaq tamakkerlugu sakialluutip tb-p ulloqartinneqarneranut atatillugu sapaatip akunnerani matumani Akilinermi tb sammineqarpoq.

Tb-millu katsorsaanerup sammineqarnerani Akilinermi naggueqatitta Inuit eqqaamasaat nuanninngitsut qaffakaatinneqartut, Inuit Tapiriit Kanatami-mit oqaatigineqarpoq. Tassami Akilinermiorpassuit 1950-ikkunni 60-ikkunnilu tb-mik nappaateqarnertik pissutigalugu, Canadap kujasinnerusortaanut katsorsartikkiartortinneqartarput. Amerlaqisullu uteqqinngisaannarlutik.

- Eqqaamasat avaanngunaqaat. Canadap issittortaani illoqarfinni nunaqarfinnilu suli tb-mik nappaateqartoqarmat illersorneqarsinnaanngilaq, Inuit Tapiriit Kanatami-mi siulittaasoq Mary Simon tusagassiuutinut nalunaarummini ilaatigut taama allappoq.

Nunaqarfiit ilaanni Canadap sinneranut naleqqiullugu tb-mik napparsimasut 170-eriaammik amerlanerupput. Tamatumunnga pissutaasut ilaat ataaseq tassaavoq, nappaatip akiorniarnissaanut naggueqatigiit Inuit inuttut atugassarititaasunik pitsaasunik atugassaqartitaannginnerat, tassami nappaat taanna naggueqatigiit Inuit akornanni qangali nungutinneqareersimasussaagaluarmat.

Inuit Tapiriit Kanatami peqqissutsimut ataatsimiititaliamik pilersitsereerput, peqqissutsimullu ajornartorsiutip taassuma imaannaanngitsup qaangerniarnissaanut iliuuseqarniarlutik, qaammammi matumani Canadami nunap immikkoortuini sisamani naggueqatigiit Inuit nunagisaanni ataatsimiititsereerlutik.