Akilinermiu nukappiaraq qimminit uiartorneqartoq
Marsip 22-ani pisoq paasineqarpoq, qimmeq siggummigut aagasattoq nalaatsornerinnakkut malugineqarpoq, qimmillu eqqaani nukappiaqqap timaa takuneqarluni. Nunatsiaq Online taama paasissutissiivoq.
Takunnittuusoq, David Kooneeliusie, ingerlaannaq politiinut sianersimavoq. Taakkulu takkukkamik qimmit pingasut aallaallugit toquppaat.
Qimmit taakku qanoq ilillutik pituussaarsimanersut paasiniaanerup takutikkumaaraa oqaatigineqarpoq. Qimminik piginnittoq, Pannertuuni borgmesteriusimasoq, Manasa Evic aallaqqasimavoq.
Pisoq inuiaqatigiinnguanut Pannertoormiunut attueqaaq. Ilaqutaasunut misiginneqataasut imaaginnavipput. Nukappiaqqap ilisaanissaanut ilaqutaasut illoqarfinni allaniittut peqataaniassammata katersuiniartoqarsimavoq. Aningaasat 7.000 dollarsit katersorneqarsimasut oqaatigineqarpoq.