Akilinermi Uranisiulernissaq tamangajammik akerleraat

Akilinermi uranisiulernissamut akerliusut amerlanerujartuinnarput.Akilinermi Nunavut kujasinnerusortaani Qamanittuaq-mi (Qamanersuarmi) Tasiujarjuaq-p (Tasiusarsuup) kitaani uranisiorfeqalernissaq oqallisigineqartaqimmat aviisi Kivalliq News Kivalliq-mi innuttaasunik taasisitsileruttorpoq, paasiniarlugu innuttaasut uranisiorfeqalernissamut akerliunersut illersuinersulluunniit.
Allattoq Najaaraq Egede
apriilip 13-at 2009 17:40

Naggueqatigiit inuit suleqatigiiffiat Nunavut Tunngavik uranisiorfeqalernissamut angereerput, aatsitassarsiornissamillu misissuisut Areva Resources Canada aatsitassarsiorfissap nunataanik misissuisut suleqatigissallugit atsioqatigereersimallugit.

Qamanittuaq-mili Kangiqliniq-milu najugallit amerlanerujartortut uranisiorfeqalernissamut akerliunerminnik nalunaartalerput.

Kivalliq News aviisimi immersugassamik nittartakkaminnilu taasivissamik ivertitsisimapput.

Apeqqutit marluk akisassaapput, siulleq taassaalluni: Uranisiornissamut naaggaarpit? Taamaappat uranisiortut isertugaateqartarnerannut uranisiornerullu kinguaariit arlallit aqqusaagassaannik avatangiisinik toqunartoqalersitsilluni mingutsitsinissannut akerliusimassaatit. Apeqqutip aappaa, tassaavoq: Angerpit? Taamaappat aatsitassarsiornerup teknikkikkut ineriartupiloornera illersorsimassavat, aamma isumaqarsimassaatut uuranisiorneq ima nakkutigilluagaatigilersimasoq allaat Qamanittuaq-mi innuttaasunut kinguaariinni arlalinni iluaqutaaginnassalluni.

Aviisip Kivalleq News-ip taasisitsinerani uranisiorfeqalernissamut maannamut naaggaartut 89 procentinngoreersimapput 11 procentiinnaat akuersaartut.

Sulili nutaarsiassaqartitsiviup innuttaasunik taasisitsinera uranisiornerup aallartinnissaanut akornusiissanersoq oqaatigineqarsinaanngilaq, taama Canadami ilanngutassiortorput Marianne Stenbæk tusagassaqartitsivoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq