Akilinermi uranisiornissamut akerliuneq alliartorpoq

Nunavummi naalakkersuisut uranisiornissamut politikimik aalajangersaarusupput, tassami aatsitassarsioqatigiiffiit Nunavummi uranisiulernissartik soqutigisorujussuummassuk. Taamaattumik naalakkersuisut innuttaasut isumaannik paasisaqarusullutik arlalinnik ataatsimiititsisarput. Taamalu sapaatip akunnerani kingullermi Nunavummi uranisortoqalersinnaanera pillugu Iqalunni innuttaasunik ataatsimiititsisoqarpoq.

Ataatsimiititsinermi paasinarsivoq, Iqalummiut Nunavummi uranisiortoqalernissaa kissaatiginngikkaat, naak ataatsimiinnermi aatsitassarsiortitseqatigiiffiiit uranisiornerup aatsitassarsiornernit allanit ulorianaateqannginneruneranik uppernarsaaniarsarigaluartut.

Japanimi atomip nukinganik nukissiorfiit ajutoortut pillugit tv-kkut aallakaatitassiarpassuit sunniuteqarsimasut, ataatsimeeqataasoq Robert Anawak CBC News-imut oqarpoq.

Sapaatip akunnerani kingullermi tv-kkut aallakaatitassiarineqartut isiginnaarsimagaanni inuit avatangiisillu qanoq eqqugaasinnaanerat eqqarsalersitsipput, Robert Anawak oqarpoq.

Ataatsimeeqataasoq alla Aaju Peter ataatsimiinnermi oqarpoq, kinguaassavut aamma isumasioqqaartinnagit, uagut naggueqatigiit Inuit ukiuni tuusintilinni sunniuteqartussamut akuersaarsinnaanngitsugut.

Ataatsimeeqataasut arlallit naggueqatigiit Inuit kattuffii aatsitassarsiorfinnik suleqateqarsimasut saassutarineqarput, periaatsiminnillu allangortitseqquneqarlutik.

Nunavummi naalakkersuisut marsip naalernerani apriilimilu Qamanersuarmi, tassa Baker Lake-imi aamma Eqaluttuutsiami, tassa Cambridge Bayimi innuttaasunik ataatsimiititsiniarput, Marianne Stenbæk Canadamit tusagassaqartitsivoq.