Akilinermi tuttut affaasa missaat navianartorsiornerarpaat
Tassami Canadap nunataani tuttut affaat angullugit avatangiisit mingutsinneqarnerisa silallu pissusaata allanngoriartornerata kingunerisaanik ulorianartorsiortitaapput, taama Canadami ilanngutassiortorput Marianne Stenbæk oqarpoq.
Nalunaarusiaq Canadami avatangiisinut ministereqarfimmiit imissutaasoq, ilisimatuussutsikkut siunnersuisartoqatigiit aamma avatangiisinik illersuiniaqatigiit suleqatigiillutik suliaraat.
Saqqummermalli neriuutigineqarsimagaluarpoq, naalakkersuisut iliuusissamik erngerlutik saqqummiussissasut, taamaattoqanngilarli.
Avatangiisinut ministereqarfimmit nalunaarput, nalilersueqqaarlutik aatsaat iliuuseqarsinnaallutik, siusinnerpaamillu tamanna 2010-mi decembarimi pisinnaasoq oqaatigalugu. Tusagaq avatangiisinik illersuiniaqatigiit ilisimatuullu eqqarsarnartoqartippaat.
- Avatangiisinut oqartussat iliuuseqajaanngippata, aatsitassarsiornermik uuliasiornermillu ingerlatallit tuttut navianartorsiornerat eqqarsaatigillannguarnagu sulianik aallartitseriaannaapput, aarlerisaarisut oqarput.
