Akilinermi qimminik toqoraaneq misissorneqassaaq

1950-ikkunniit 70-ikkut tungaannut Canadami politiit naggueqatigiit Inuit qimmiinik 20.000-inik toqoraasimanerat aaqqissuussamik nungusaanerusimanersoq januaarimi misissorneqalissaaq.
Allattoq Jokum Nielsen
novembarip 27-at 2007 06:28

Naggueqatigiit Inuit qimmii toqorarlugit qangatut inooriaasertik qimallugu najugaqarfimminniit illoqarfinnut pinngitsaalillugit nuutsiniarsimasorineqarput. Politiit namminerminnut tungasut 2005-imi misissuiffigigamikkit imminnut pinngitsuutipput. Misissuinerli Naggueqatigiit Inuit kattuffiinit tutsuiginanngitsutut isornartorsiorneqarpoq, politiillu iliuussaasa sunniuteqarsimanerannik puigorsaanerinnaasorineqarluni.

Maannakkulli ”Eqqortoq qulaarniarlugu ataatsimiititaliarsuaq”, James Igluliorte siuttuliullugu pilersinneqarpoq, taannalu illoqarfinni 13-ini, Qeqertaalummiittuni tusarniaalluni angalaassaaq. Tusarniaanerni pisimasunik eqqaamannittut ataatsimiititaliarsuarmut toqqaannartumik oqaluttuarnissaat anguniarneqarpoq, Nunatsiaq News allappoq.

Ataatsimiititaliarsuaq peqqarniitsuliorsimanernut aningaasanik taarsiiffigitinnissat piumasarisinnaanngilaat, anguniarneqartorli pingaarneq tassaavoq Canadami naalakkersuisut peqqarniitsuliorsimanernut utoqqatsissasut, politiit innuttallu saammaateqatigiissinnaaniassammata.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq