Akilinermi qilalugarniarneq unippoq
Qilalukkat Akilinermi Nunaviup avannamut sineriaaniittut ikilivallaarsimammata tasamani qilalugarniarneq Nunavimmi oqartussanit unitsinneqarpoq.
Nunatsiaq News-ip nittartagaani ullumi taama allaaserinnittoqarpoq.
Qilalukkat qaqortat Hudsonip Kangerliumarnganiillutillu Ikerasaaniittut 200-t ataallugit taamaallaat amerlassuseqalersimanerarneqarput.
Ungava Bay-imi, Hudsonip Ikerasaaniittumi, qilalukkanik qaqortanik qulingiluanik pisassiisoqarsimagaluarpoq, tamarmilli pisarineqanngillat. Tassa pingasuinnaat pisarineqarsimagamik. Ajornartorsiulli tassaavoq sumiiffinni allani pisassanik sippuisoqarsimanera.
Assersuutitut taaneqarsinnaasut tassaapput:
Kangirsummi qulingiluat pisassiissutigineqarsimapput, pingasunilli sippuisoqarsimalluni.
Kuujjuarmi 13-inik pisassiisoqarpoq, arfinilinnilli sippuisoqarsimalluni.
Salluinni: 18-inik pisassiisoqarsimagaluartoq 33-nik pisaqartoqarsimavoq.
Kiisalu Kangiqsujuarmi: ataasiinnarmik sippuisoqarsimavoq. Tassa pisassiissutigineqartut 15-iusut 16-inik pisaqartoqarsimagami.
Taarsiullugu ukiuunerani qilalugarniartoqarsinnaassaaq.