Atasinnaasumik annertusisamik aningaasaqarnikkut ineriartortoqarnissaa pingaartillugu Inuialuit iliuuseqarput, pisuussutinik pinngortitameersunik piiaaneq kisiat samminagu. Periarfissat ilagaat naalakkersuisut neriulluarfigisaat tv-mi aallakaatitassiorneq filmiliornerlu, tamakkuninnga niuerfik annertusiartuinnarmat.
Inuialunni suliffissuaqarnermut, takornariaqarnermut ineriartornermullu naalakkersuisoqarfiup filmiliornermut ataatsimiititaliaq pioreersoq allanngortippaa nutaanillu sulisunik atorfinitsitsilluni, inuusuttunik filmiliortartunillu nutaanik toqqaannartumik suliaannit ineriartortitsinermi aningaasanillu ujarlernermik suleqateqartussanik.
Filminut tv-kkullu aallakaatitassianut nunat inoqqaavisa inooriaasiannik avatangiisiannillu allanertanillu takutitsisunut niuerfissaqarpoq; Inuialunnilu, Nunavummi Nunavimmilu aamma filminut tv-kkullu aallakaatitassianut sumiiffimmi kulturimik oqaatsinillu takutitsisunut niuerfeqarluni.
Inuialunni naalakkersuisut pilersaarusiorsimapput, "Inuiaat avannaamiut suleqatigiipput"-mik atsersimasaminnik. Sumiiffiit avannaaniittut issittumiittullu suleqatigiinnerisigut aningaasaqarnerminnik aaqqinnissaannik siunertalik. Suliniullu filmiliornermut tunngasoq suliniutit siullersaraat.
Inuialunni inuusuttut tapersersuinnarnagit aammali filmiliortartut tv-kkullu aallakaatitassiortartut allaneersut aggersarniarneqarput, Inuialuit nunataa Inuialunnilu inooriaatsit assigiinngitsut ussassaarutiginerisigut.
Aallaqqaasiutitut naalakkersuisut inuusuttunut filmiliortartunut tv-kullu aallakaatitassiortartunut koruuninik millionip affaanik tapiipput, amerlanertigummi aningaasat siulliit pissarsiariniarneri ajornarnerpaasarmat.