Ikinngutigiit, 15-inik ukiulik, Isajah Nastapoka, aamma 17-inik ukiulik, Kasudluak' Kasudluak', nunaqarfimminniit Inukjuak-miit nannunniassallutik qaammat una aallartilaartoq aallarput.
Nukappissat imermik nerisassanilluunniit taquaqaratik aallarput, nunaqarfimminniillu kilometerinik 30-nik ungasitsigilereerlutik, 35-nik issittoq, qamuteralaat orsueruppoq sumiissuseeruttoorlutillu.
Ulluni sisamani tulliuttuni Quebecip avannarpasissuani qeriuaannartup masarsuaniipput.
Ullut sisamat ujaarineqareersullu nukappiaqqap aappaa sumiissusersineqarpoq. Ikiortissarsiornissartimmi eqqarsaatigalugu tamarmik immikkut pisussimapput.
15-inik ukiulik Nastapoka kilometerit 80-it pisussimavoq, timaalu nillerterujussuarsimalluni, kavaajaariarlunimi apummut imminut assaassimavoq.
17-inik ukiulik Kasudluak' ulorianartorsioreeqaluni nassaarineqarpoq. Ilaatigut amaqqunut ataatsimoortunut akiuuttariaqarsimalluni ataaserlu aallaasariaqarsimallugu. Taanna qerussorsimangaarami Montrealimi napparsimmavimmut unitsinneqartariaqarsimavoq, isigaanilu inuai tamaasa nakorsanit sapinngisamik annaanniarneqarsimallutik.