Akilinermi inuit pingasut tammaaneqartut ajunngitsut nassaarineqaput

Nunavumi inunnik marlunnik meeqqamillu mikisumik ulluni tallimani ujaasineq nuannersumik naggateqarpoq. Taakkua pingasuullutik qanga inuit pisarnerattut illuikkiorlutik, meeraaraq tuttup amianut immullugu qullermillu puisip orsutortumik kissassarnermikkut annapput. Taama allappoq globeandmail.com.
Allattoq Jaaku Lyberth
novembarip 19-at 2007 17:17

63-inik ukiulik Laimiki Innuarak, taassuma nulia ernerallu sisamanik ukiulik nunaqarfiup Illullip tungaanut Innuaqqap qatanngutaa arnaq tikeraassallugu qamuteralannik ingerlatillutik tammarput. Aqqutaanili qamuteralak aserorpoq. Taakkua illerni anorersuup nal. akunneranut kilometerinik 50-inik sakkortussusillip tammartippai issisiullu 30 gradinik issilerluni.

Taakkua pingasuullutik sisamanngornermi ualinerata tungaanut piniartup apummi tumisinissaata tungaanut pisummik timmisartumillu ujarneqaraluarput iluatsitsiviunngitsumilli. Qamuteralaat pingasut tumit tussarlugit aallarput erniinnarlu Laimiki Inuuarak nal. akunnerini qulinik pisoreersimasoq naapillugu. Taanna qasugaluarpoq qerussulaarsimallunili. Aamma taassuma nulia meeraallu illuikkami ikiortissanik utaqqisut taamaapput.

Ilaqutariit Innuaqqakkut aqqummi atorneqarajunngitsumi tammaraluarput, tassami siku aqqutigisartagaanniittoq immallu sikuatigoortoq naannerusorlu saappallaaqimmat.

Aatsaat siullermik Illulimmiut ujaasineq nuannersumik naggatilik misigilinngilaat. Juunimi 81-inik ukiulik Enoki Kunuk tammaraluarpoq ullullu 28-t qaangiuttulli aatsaat nanineqarluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq