Akilinermi attaveqaqatigiinnermut aningaasaliissutit atoqquaat
Tassami attaveqaatit pitsanngorsaavigineqarnissaannut aningaasat atugassat uninngatinneqartut atorneqartariaqarmata. CBC Newsip nittartagaani taama allaaserinnittoqarpoq.
Canadap attaveqarnermut ministeria John Baird Nunavummiut, Northwest Territoriesimiut Yukonimiullu siuttuisa Ottawami ippassaq ataatsimeeqatigai, attaveqaatillu pitsanngorsaavigineqartariaqarnerat ataatsimiinnermi oqaatigineqarpoq.
Aningaasanut inatsisissatut siunnersuut aningaasaqarnermut ministerimit Jim Flahertymit sapaatip-akunneri pingasut qaangiuppata saqqummiunneqassaaq, tamannalu Northwest Territoriesip ministeriuneranit Floyd Rolandimit arajutsisimaneqanngilaq:
- Piumasaqaatit timitalerneqarnissaat piffissami kingullermi aalajangiusimajuarsimavara, piumasaqaatillu piviusunngortinneqarsinnaanissaat maanna neriuutigilluinnarpara, aningaasanummi inatsisissatut siunnersuut naalakkersuisut naammassingajalerpaat, Floyd Roland oqarpoq.
Aningaasat attaveqaatit pitsanngorsarneqarnissaannut atugassat 40 milliardit koruunit missaanniittut, naalakkersuisunit 2007-imi illikartinneqarput, maannalu 2009-nngoreersoq 14 milliardit koruunit suli atorneqanngillat.
