Akiliivallaartoqartarpa?

Kalaallit napparsimasut, Region Hovedstadimi katsorsartikkiartortut immikkut ittumik katsorsarneqartussatut nalilerneqartarput, taamatullu nalilersuinermut atatillugu akigitinneqartartut Danmarkimi napparsimmaviit namminneq aalajangersinnaavaat.
Ajornartorsiulli tassaavoq Danmarkiliarlutik katsorsartikkiartortut ilaannai immikkut ittumik katsorsartinneqartussatut nalilerneqarsinnaammata, akikinnerusumillu katsorsarneqarsinnaallutik.

Sara Olsvig isumaqarpoq Namminersorlutik Oqartussat Region Hovedstadimut ukiumut 15-it aamma 20 millionit koruunit akornanni katsorsaanissamut aningaasartuuteqarpallaartartut.

Napparsimasut Danmarkimut siumut utimullu angallanneqarnissaannut Namminersorlutik Oqartussat saniatigut aamma aningaasartuuteqartarput, Sara Olsvigillu tamanna isornartoqartippaa:

- Namminersorlutik Oqartussat napparsimasut katsorsarneqarnissaannut akiliutigisartagaat Danmarkimi peqqinnissaqarfiit akiliutigisartagaannut assingusariaqarput, Sara Olsvig oqarpoq.

Danmarkip peqqinnissamut ministeriata Astrid Kragip akiliutigineqartartut pillugit nalunaarusiornissaa, napparsimasullu qassit immikkut ittumik katsorsarneqartussatut siorna 2010-mi nalilerneqarsimanersut, Sara Olsvigip piumasarivaa.

Namminersorlutik Oqartussat Region Hovedstadillu akornanni akigitinneqartut nalimmassarneqarnissaat matumani anguniarneqarnissaa siunertaavoq.