Akiliisitsiniartarnerup kommuninut nuutsinneqaqqinnissaa ujartorpaa
Pisortanut akiitsunik akiliisitsiniartarnerup kommuniniit Namminersornerullutik Oqartussanut suliassanngortinneqarnerata kingorna akiliisitsiniartarneq unittuuissimasoq, Kujataata kommunissaani ikaarsaariarnermut ataatsimiititaliap siulittaasua Simon Simonsen Naalakkersuisunut ammasunik allagaqarluni allappoq.
- Piffissami kingullermi paasivarput akiliisitsiniartarneq maannamut unittuuissimasoq. Soorlu ineqarnermut akiliisarnerit uninngasutut taaneqarsinnaagunarput. Akiliisitsiniartarnermi kujataani qaammammut isertinneqartartut 1 millionit maanna takuneqassaarput. Qaammatini kingullerni sisamani ilisimatinneqarnerput malillugu Qaqortumi 120.000 koruunit kisimik isertinneqarsimapput -, Simon Simonsen aamma allappoq tamanna naammagineqarsinnaangilluinnartoq.
Simon Simonsenip Naalakkersuisut kajumissaarpai aaqqeeriaraluarnerit iluatsinngitsut nassuerutigalugit suliaq pineqartoq kommuuninut piaarnerpaamik utertinneqaqqullugu, siornatigut ingerlatsineq ajunngivikkaluarmat.