AKiliisitsiniartarneq kommuninut uterteqquaa

Akiliisitsiniartarnerup qitiusumik ingerlanneqalernera Ilulissat kommuniata aningaasaqarniarneranut sunniuteqarpoq, kommunimi innuttaasut akiitsui 6,2 million koruuninik qaffariaateqarsimammata.
Allattoq Najaaraq Egede
septembarip 24-at 2008 17:28

Ilulissani Borgmesteriugallartoq Bendt B. Kristiansen, Inuit Ataqatigiinneersoq oqarpoq, akiliisitsiniartarneq kommuninut uterteqqinneqartariaqartoq ilaatigut manna pissutigalugu:

- Kisitsisit kingulliit naapertorlugit januaatimiit maannamut akiitsut 6,2 mio. kr.-nik qaffassimapput. Akileraarutit pineqanngillat, akiitsulli nalinginnaasut pineqarlutik, Bendt B. Kristiansen oqarpoq.

KANUKOKA-p siulittaasuata Søren Alaufesenip ataatsimeersuarnermi oqalugiaatimini oqariartuutaa taamaalilluni Ilulissanit taperserneqarpoq.

- Akiliisitsiniartarnerup Nuummut qitiusumik ingerlatsivimmut nuunnera ilorraap tungaanut sangutitsisimanngilaq. Kommunimmi karsiinut aningaasanik tigoriaannakkanut sunniuteqarpoq. Naalakkersuisunut oqaloqatigiissutigisariaqarparput, oqarpoq.

Naalakkersuisut siulittaasuat Hans Enoksen KANUKOKA-p ataatsimeersuarnerani oqaaseqarnermini qitiusumik ingerlatsineq iluatutaanerarlugu oqarpoq, tamannali akiitsunut tamanut iluaqutaanngitsoq Bendt B. Kristiansenip erseqqissarpaa.

- Aap, akileraarutinut iluaqutaasimasoq, Kisianni paaviaanerit, eqqaaviit, anartarfiit assigisaallu, kommunit nakkutigisaat akilinngitsoorneqartarput, kommunit aningaasaqarneranut ilungersunartumik. Qitiusumik akiliisitsinairtartut suliat tamakku ataasiakkaat sukumiisumik nalinnaaffigisinnaanngilaat, IA sinnerlugu Ilulissat kommunalbestyrelseani ilaasortaq oqarpoq.

Naalakkersuisut siulittaasuat Hans Enoksen ualilluinnartoq oqaaseqartinniaraluaratsigu ajoraluartumik iluatsitsinngilagut.