Akiliisinnaajunnaarnissaq Ammeriviup pakkersimaniarpaa
Ammeriviup pisortaa Henrik Estrup taama oqarpoq:
- Akissaqarniarnikkut tamaviaarnaqaaq. Aningaasat kaaviaartitagut ukiuni kingullerni ikiliartupiloornerat tamatumunnga pissutaavoq. Aningaasat 2006-imi kaaviiaartitagut 69 millioni koruuniupput, siornalu 16 millioniinnaallutik, taamaammat ajornartorsiuteqarpugut, Henrik Estrup oqarpoq.
Immikkut ittumik aningaasaliisoqassagaluarpat, piffissaq ungasinngitsoq eqqarsaatigalugu akissaqarniarnikkut ajornartorsiuteqartoqaqqilissannginnersoq Henrik Estrup aperaarput, taamaalluarsinnaasorlu, taassuma oqaatigaa. Erseqqisaatigaali aningaasat kaaviiaartitat amerlinissaat pillugu suliniartoqartoq.
Ammit avammut tunineqartartut amerliniarneqarput, puisillu amiisa saniatigut amminik allanik aamma nioqquteqartoqarluni. Soorlu umimmaat tuttullu amii, pingaartumillu savat amiinit pisunit aamma nioqquteqartoqarluni.
Kiffartuussinissamut isumaqatigiissut naapertorlugu tunisinermi aningaasartuutaasussat akilerneqarnissaat juulip aallaqqaataaniit juunip aallaqqaataanut siuartinneqarnissaat Namminersornerullutik Oqartussanut aamma qinnuteqaatigineqarpoq.
Aggustip aallaqqaataaniit aningaasartuutaasussat qinnuteqaatigineqartut 8 millioni koruuniupput, ammerivik taamaaginnarluni ingerlassappat 8 millioni koruunit pisariaqartinneqartut Henrik Estrupip oqaatigaa.
Ammerivilli matuneqalinngilaq, aningaasartuutaasussalli eqqarsaatigalugit 8 millioni koruunit immikkut ittumik qinnuteqaatigineqarput, aningaasalli taakku tunniunneqanngippata ammerivik allatut ingerlanneqartariaqalissasoq ammeriviup pisortaata oqaatigaa. Great Greenlandip Qaqortumi ammeriviani sulisut 40-t missaanniipput.
