Akiliisinnaajunnaarnermik eqqugaasut SIK-mut ikiorneqarnissamik qinnuteqarsinnaapput
- Suliffeqarfik sunaluunniit akiliisinnaajunnaaraangat uagutsinnut nuanniinnarneq ajorpoq. Tassami akiliisinnaajunnaartoqaraangat sulisorpassuit eqqorneqartarmata, Jess G. Berthelsen oqarpoq.
Aamma atuaruk Tasiilami sanaartornermik suliffeqarfik akiliisinnaajunnaarluni matuvoq
Viking Greenland A/S-ip Tasiilami sanaartukkat arlallit suliarigaluarpai. Soorlu meeqqerivissaq, tassungalu eqqakkat aqqutissaat inissallu.
Akiliisinnaajunnaarnerup kinguneranik sulisut 30-it angerlartinneqartut, suliffeqarfiup akiliisinnaajunnaartup pigisaanik aqutsisup paasissutissiissutigaa.
Suliffissaaruttulli akissasiassaminnik annaasaqartut ikiussallugit, siulittaasuata neriorsuutigaa.
- Sulisut taakkua suliffeqarfimminngaanniit aningaasarsitinneqarsinnaanngippata Lønmodtagernes Garantifondimiik qinnuteqaassussinnaagatsigit ikiorlugit, Jess G. Berthelsen oqarpoq.
Aamma atuaruk Venture Greenland akiliisinnaajunnaarneq pillugu: Piginneqataassutigut annaavagut
Lønmodtagernes Garantifond, tassa Danmarkimi sulinermik inuussutissarsiuteqartut assersuutivgalugu suliffitsik akiliisinnaajunnaarluni unippat akissarsiassaminnik annaasaqannginnissamut sillimmasertarfiat, SIK-mut ilaasortat aamma peqataaffigisaat.
Kisianni tassannga ikiorneqassagaanni SIK-mut ilaasortaanissaq piumasaqaataasoq, siulittaasup naqissuserpaa.
- Ilaasortagut taamatut eqqorneqarsimasut inakkusuppakka taassuma tungaatigut isumagineqareersimanngippata SIK-mut saaffiginneqqullugit taamaalilluta ikiorsinnaaniassagatsigit qinnuteqarnissaat siunertaralugu, Jess G. Berthelsen oqarpoq.