Akiliisinnaajunnaarneq Greenland Venturep uppernarsarpaa
Inuussutissarsiutinut aningaasaliisartut, Nuuk Total Constructions ApS-imik piginneqataasut, Greenland Venture taama nalunaaruteqarput.
Nuummi ilinniartut ineqarfissaannik sanaqataasussatut sapaatip-akunnerata siuliani tallimanngornerup tungaanut taakku inissisimagaluarput.
Ilinniartut Blok P-mi Centerkollegiami ineqartut kollegiani nutaani initaartinneqarnissaat pillugu sanaartornermut peqataagaluarput, sanaartugassanilli suliassinneqartartut maanna akiliisinnaajunnaarlutik.
Sulisut akissarsitinneqarsimannginnertik pissutigalugu sulinertik tallimanngormat januaarip 28-ani unitsippaat.
Blok P ukiup massuma naajartulernerani inuerutitinneqarpat ilinniartut allami inissaqarumaartut, Ineqarnermut naalakkersuisup Jens B. Frederiksenip ippassaq neriorsuutigaa.
- Namminersorlutik Oqartussat inissianik pisisussatut sanatitsisorlu pitsaasumik oqaloqatigiittartut erseqqissaatigissallugu pingaaruteqarpoq, ullunilu makkunani atorfilittannit sanatitsisoq ataatsimeeqatigineqaqattaarpoq, taassumalu sanaartorneq ingerlaqqissinnaaniassammat inuttalersuinissamut pilersaarut nutaaq saqqummiuttussaavaa, Jens B. Frederiksen tusagassiutinut allappoq.
Ilinniartut ineqarfissaat ukioq manna februaarip aallaqqaataani naammassineqartussaagaluarpoq.