Akiligassatoqqat annilaarutaasut massakkut akilerneqassapput
Taannarpiaavormi siorna atuisunut nassuissuunneqarsimasoq, najugaqartulli peqatigiiffiannit IPK-mit SIK-miillu isornartorsiorneqarujussuarnerata kingorna utertinneqartoq. Taarsiullugu a conto-mik akiliut 15-20 procentimik qaffanneqarsimasoq, Ini-mi sullissinermut pisortaq Birte Kielsen oqarpoq.
- Tassa taakkua kiassarnermut naatsorsuutininngaanniit pilersuupput. 2011-mi naafferartumi akiliutissat appartinneqarsimagamik, taavalu taasuma kingornatigut uulia marloriarluni akitsoraluartoq aammalu Nukissiorfiit 22 % tikillugu qaffaagaluartoq, naaferartumi akiliutit qaffaneqanngitsoorsimallutik. Aamma piginnittuminngaanniit piumasarineqarmat blokkit kiassaateqarfiinit Nukissiorfiini kiassarneqartuni aamma piumasarinaqarmat toqqortaqalissasut siunissami aserfallatsaalinissamut.
A/S Inissiaatileqatigiiffimmi INI-mi sullissinermut pisortaq Birte Kielsen taama nassuiaavoq, kiassarnermut tapiissutit attartortunut 10.300-nut nassiussorneqarsimasut pillugit.
Sillimmatissat immikkoortitat eqqartungai tassaaapput aningaasat aserfallatsaaliinermut atungassat. Tamakku siornatigut attartornermut akiliummiit tiguneqartaraluarput, Naalakkersuisulli aalajangersimapput siunissami aningaasat kiassarnermut akiligassanit aaneqartalissasut.
Immikkullu akiligassiinissaq pinngitsoorniarlugu, inissiaatileqatigiiffiup a conto-mik naatsorsuutit ukiup affakkaartumik naligiissaartalersimavai, siullermik siorna augustip aallaqqaataani taamaaliorpoq, tullissaanik januarimi 2013-imi. Aamma aalajangerneqareerpoq aasaru juulip aallaqqaataani a conto-mik akiliutip naligiissaqqinneqarnissaa.
Juunip arfineq aappaanni 2012 inissiaatileqatigiiffik siullermik nalunaaruteqarpoq allakkanik nuannerpallaanngitsunik imalinnik nassiussuisimalluni. Qaammat ataasiunngitsorluunniit piffissaliullugu kalerriutigineqarpoq kiassarnermut akiliut 50 procent-imik qaffassasoq. Kalerriutigineqarmat aqaguani pisortap Jukku Mølgaard-ip nalunaarutigaa taamaaliorneq tillinnerunngitsoq; taavali juunip 11-anni akiligassaq utertillugu.
- Kiassarnermi naafferartumi akiliutit taamaallaat 15-20 % missaanik qaffattariaqarlugit taamanikkut. Kisianni aamma taamanikkut allagarisatsinni nalunaarutigivarput ukiormannamut 2012-mut naatsorsuut saqqummiunneqarpata attartortutta ilimagissagaat akiligasinneqarnissartik annertuumik, Birte Kielsen taama oqarpoq.
Ilanngullugulu oqaatigalugu qaffaaneq naammanngilluinnarsimasoq, tamaattumillu assigiinngitsunik angissusilinnik akiligasseeqqissimallutik.
Aamma Birte Kielsen oqarpoq, ilisimalluinnarlugu akiligasseeqqinneq pissakinnerusunut artukkeerujussuarsinnaasoq, taamaattumillu Namminersorlutik Oqartussat qinnuigisimallugit akilersueriaatsimik oqinnerusumik piumallutik, peqqussummitut qaammatit sisamaannaat pinnagit.
- Ineqarnermut pisortaqarfimmut apeqquteqaammik saqqumiussaqarpugut akiligassaq taanna sivisunerusumik akilersorneqarnissaa qinnutigalutigu.
A/S Inissiaatileqatigiiffik INI nuna tamakkerlugu 10.300-nik attartortoqarpoq, taakkunanngalu 3.300-it akiligasseqqinneqarsimallutik. 3.300-nit attartortut 150-it kukkusumik akiligasseqqinneqarsimasut april-illu naannginnerani naqqinneqarumaartut Birte Kielsen neriorsuivoq.
