Akileraarutitigut kinguneqassaaq
juunip 25-at 2005 19:21
Naalakkersuisunut ilaasortaasimasup Jens Napaattuup ilassinnissutissanik atuiallaarsimanera akileraarutitigut kinguneqartussanngorunarpoq.
Akileraartarnermut pisortaqarfimmi isumaliutigineqarpoq misissuisoqarnissaa. Tamannali aatsaat pisinnaavoq Namminersornerullutik Oqartussat suliaq pillugu sukumiisumik misissuereerpata.
- Napaattuup malittarisassanik unioqqutitsisimanera takussutissaqarpat, taamalu nammineq inuttut atuisimasoq, aningaasartuutigisimasat taarsertariaqassavai. Tamanna pisinnaanngippat taava akileraarutitigut akilersortariaqarpai, matumanimi pineqarmat immikkut isertitaqarsimaneq, taama nalunaarpoq Akileraartarnermut pisortaqarfimmi immikkoortortaqarfimmi pisortaq Ferdinand Hammeken.