Akileraarutitaqanngitsumik isertitaqarneruleqqissinnaanngorput

Danmarkimi kalaallit ilinniagaqartut qallunaanit ilinniagaqartunit akileraarutitanngitsumik amerlanernik aningaasarsiorsinnaanertik maanna qulakkeerpaat. Inatsit nutaaq, kalaallit ilinniagaqartut aningaasarsiaasa ilanngaataasa qaffanneqaqqinnissaannut tunngasoq, Folketingimi amerlanerussuteqartut marlunngormat akuersissutigaat - tamanna ukiup aallartinnerani atorunnaarsinneqaraluarpoq.
Allattoq Carla Davidsen
maajip 05-at 2011 10:15

Kalaallit ilinniagaqartut ukiumut 71.000 koruuninik akileraarutitanngitsumik 2010 ilanngullugu aningaasarsiorsinnaasimapput. Januaarimiilli 42.900 koruuniinnanngortinneqarpoq, nunani allamiut Danmarkimi ilinniagaqartut tamarmik aningaasartuutinut ilanngaataat appartinneqarmata.

Inatsilli nutaaq, maanna tassa akuersissutigineqaqqammersoq, pissutigalugu savalimmiormiut kalaallillu ilinniagaqartut tassa ukiumut 36.000 koruuninik akileraarusiinermi ilanngaaserneqartalissapput, soorlu siornatigut taamaassimasoq.

Ilinniagaqartut aningaasarsiaasa ilanngaataasa qaffanneqarnerat inatsisinit arlalinnit pinngortuuvoq, ilinniagaqartut ajunngitsorsiassaat killilerneqarsinnaanngorluni, siunnersuut naalakkersuisunit Socialdemokratinillu apeqquteqaatigineqarpoq, siunnersuutilli tapersernissaa partiit sinnerisa aamma isumaqatigiissutigaat.

Kalaallit savalimmiormiullu Danmarkimi ilinniagaqartut qallunaanut ilinniagaqartunut naleqqiullugit ilinniagaqarnermik nalaanni artornannginnerusumik atugaqarnissaat Dansk Folkepartip aamma  taperserpaa.

Radikalit, SF, Liberal Alliance savalimmiormiullu Folketingimut ilaasortaatitaat talerperliusoq, Edmund Joensen, aamma taamaaliorlutik.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq